Edukira salto egin | Salto egin nabigazioara

Tresna pertsonalak
Hemen zaude: Hasiera Albisteak [Bertan behera] Erromeria izango da ardatza Inpernuko Poza jardunaldian

Dokumentuaren akzioak

[Bertan behera] Erromeria izango da ardatza Inpernuko Poza jardunaldian

2020/10/21 14:00
[Bertan behera] Erromeria izango da ardatza Inpernuko Poza jardunaldian

Erromeria, 1952. Argazkia: Dmitri Kessel / Life aldizkaria

Sabin Bikandi, Patxi Laborda, Xabier Etxabe, Xabier Itzaina, Joseba Altube eta Aritz Ibañez erromerien inguruan arituko dira Inpernuko Poza Trikitixaren Jardunaldian. Euskal Herriko Trikitixa Elkarteak antolatutako XVIII. Jardunaldia Tolosako Kultur Etxean egingo da urriaren 31n. Aurtengo egoerak behartuta egitaraua egun bakarrera murriztu behar izan da.

Erromeriak izango dira aurtengo jardunaldietako ardatza. Euskal Herriko trikitilarien sehaska nagusienetakoak erromeriak izan dira; ezinbesteko funtzio soziala izan dute eta gizartearekin batera eraldatuz joan dira. Erromeriek lehen zuten eta orain duten funtzioak erreparatu eta konparatuko dira eta erromerien egungo egoeraz eta etorkizunaz hausnartzeko aukera zabalduko da goizeko hitzaldian eta arratsaldeko mahai inguruan.

Erromerien bilakaera

Goizeko hitzaldian Aiko taldeko Sabin Bikandik eta Patxi Labordak erromeriei buruz duten ikuspegia azalduko dute hitzaldi bidez. Erromeriek daramaten bilakaera barne-barnetik bizi dute; urteak baitaramatzate plazetako dantzak irakasten eta Euskal Herriko plazatan erromeria-gidatuak antolatzen. Esperientzia horretatik arituko dira bi musikariak eta dantzariak.

Erromeriak lurraldez lurralde

Arratsaldeko mahai inguruan, berriz, erromeriaren errealitatea lurraldez lurralde aztertzea da asmoa. Euskal Herriko lurralde ezberdinetako ikuspegiak parekatzeko gonbidatu dituzte Gipuzkoatik Xabier Etxabe, Nafarroa Beheretik Xabier Itzaina eta Bizkaitik Joseba Altube. Iruñeko Aritz Ibañez dantzariak eta kazetariak gidatuko ditu.

Etxabe Eusko Ikaskuntzako partaide da eta hainbat ikerketa eginak ditu bere jaioterria den Zarauzko kulturari buruz eta nola ez, bertako dantza taldeak aitzakia hartuta, baita erromeriaren inguruan ere. Itzaina Emile Durkheim Bordeleko ikerketa zentroko zuzendaria da. Euskal Herria ardatz hartuta hainbat liburu argitaratu ditu, besteak beste herri kultura eta tradizioak ere kontutan izanik. Altube, berriz, hainbat urtez Euskal Dantzarien Biltzarreko lehendakari izan da eta Bizkaiko erromeriak gertutik bizi ditu.

Inpernuko Poza Trikitixaren jardunaldian, Hitzaldia

  • Eguna: Urriak 31, larunbata
  • Ordua: 12:00-13:30
  • Lekua: Tolosako Kultur Etxean*
  • Hizlariak: AIKO taldea – Sabin Bikandi eta Patxi Laborda

 

Inpernuko Poza Trikitixaren jardunaldian, Mahai ingurua

  • Eguna: Urriak 31, larunbata
  • Ordua: 16:30-18:00
  • Lekua: Tolosako Kultur Etxean*
  • Mahai ingurua: Xabier Etxabe, Xabier Itzaina, Joseba Altube
  • Moderatzailea: Aritz Ibañez

 

*Azken egunetako neurriak direla eta egoerak horrela eskatuta Inpernuko Poza XVIII. Jardunaldia ateak itxita egingo dira. Bi hitzorduak ordu berdinean mantenduko dira eta streaming bidez zabalduko dituzte edonorentzat ikusgai EHTEren sare sozialetan.

Sare sozial hauetako konturik ez badaukazu ere, Facebookeko kontua edonorentzat irekia izango da.

Dokumentuaren akzioak

2020/10/21 12:05
Etxetik ikusteko moduan jarriko al dira Erromeriaren inguruko hitzaldia eta mahai ingurua?
2020/10/22 08:09
Euskal Herriko Trikitixa Elkartetik adierazi digute goizeko hitzaldia Aikok grabatuko duela eta aurrerago beraien plataforman eta sare sozialetan argitaratzeko asmoa dutela. Arratsaldeko mahai ingurua, berriz, Trikitixa Elkarteak grabatuko du artxiboan jasotzeko, ez da argitaratuko.
2020/10/28 11:46
Euskal Herriko Trikitixa Elkarteak esan du egoerak horrela eskatuta eta arduraz jokatu nahirik, Inpernuko Poza XVIII. Jardunaldia ateak itxita egingo dituela. Bi hitzorduak ordu berdinean mantenduko dira eta streaming bidez zabalduko dituzte edonorentzat ikusgai EHTEren sare sozialetan.

Erantzun

Erantzuna emateko identifikatu egin behar zara, gure webgunean erabiltzaile bat sortuz.