AIKO Taldeak dantzan jarriko du Basque Fest, dantza tailer bat eta erromeria bi eskainiz

Basque Fest jaialdia itzuli da, eta beste urte batez, AIKO Taldeak bat egingo du Bilboko Aste Santua gure kultura ahalik eta modu egokienean ezagutarazten duten jarduerez betetzen duen hitzorduarekin, Aste Santua gozatzera animatuz. Iaz musika eta dantza tradizionalaren hedapenean behar egiten duten musikariz eta dantza maisuz osatutako kolektiboak jaialdian bi parte hartze izan bazituen, aurten hiru izango ditu, erromeria biei, aurretik dantza tailer baten antolakuntza gehituko baitie. Aukera paregabea dantzaz gozatuz oinarrizko nozioak ikasi gura dituzten pertsona guztientzat zabalik egongo den klase praktikoan parte hartzeko.

AIKO Taldeak Basque Fest jaialdian izango duen partaidetza Bizkaiko hiriburuko bi leku enblematikotan gauzatuko da. Lehenengo, Plaza Barrian, zapatuan, apirilaren 20an, 17:00etan, dantza tailerra eskainiz. Bertan, Aikoko dantza maisuek parte hartzera animatuko dute jende guztia, bakoitzak aurretik dituen trebezietan edo ezagutzetan oinarrituta, musika eta dantza modu naturalean, intuitiboan eta, batez ere, dibertigarrian sentitzen ikas dezaten.

Ondoren, ikasitakoa erakusteko unea helduko da. 18:30ean, dantza tailerraren ostean, erromeria hasiko da. Bertan, Sabin Bikandi (txistua eta danbolina), Álvaro García (gitarra), Amaiur Cajaraville (kontrabaxua) eta Txus Aranburu (akordeoia) musikariek eta Patxi Laborda dantza maisuak jende guztia gozatzen jarriko dute, dantza egiteko musika errepertorio zabalarekin. Ez dira jauziak, jotak, porruak, mazurkak, pasodobleak, baltsak, tangoak, eta abar luzea faltako.

Artxandan, erromeria eta larrain dantza Bizkaiko Gaiteroekin.

Domekan ordua eta agertokia aldatuko ditugu. 12:00etatik 14:00etara, Artxanda mendiak bigarren erromeria jasoko du, eta sagardo dastaketa egongo da. Aire librean eta Artxandako begiratokiak eskaintzen dituen ikuspegi bikainez gozatuz, AIKO Taldearen dantza saioak plan bikaina eskaintzen du domekarako: musika eta dantza ingurune naturalean eta ezinbesteko bisita bertaraino Artxandako funikularraren bitartez hel daitezkeen turistentzat. Gainera, Erromeria horretan, Bizkaiko Gaiteroak elkarteak ‘Lizarrako larrain dantzan’ parte hartzera animatuko du jende guztia.

Erromeriei esker, Aste Santuan Bilbora datozen bisitari ugariek euskal dantza ezagunen lehenengo pausoak ikasi ahal izango dituzte eta parte hartze aktiboa izango dute. Horren guztiaren helburua, gure kulturara hurbiltzea eta horren berri ematea da, ahalik eta modurik hoberenean: esperimentatuz.

AIKO taldea, dantza tradizionala pasioz bizi duten musikariz eta dantza maisuz osatutako kolektiboa da, eta hamar urte baino gehiago daramatza dantzaren hedapenean lanean, mota guztietako jardueren bidez: interpretatuz, dantza eginez, irakatsiz, grabatuz, ikertuz… Lan horietan guztietan BBK Fundazioaren lankidetza du.

• Plaza Barriak dantza tailer irekia jasoko du zapatu honetan, 17:00etan; bertan, AIKO Taldeak dantzan erakutsiko du, 18:30ean bere erromeria ezagunetako bat egin aurretik

• Artxanda mendia izango da domekan, apirilaren 21ean, 12:00etan, Aikoren bigarren erromeriaren agertokia, Bizkaiko Gaiteroen partaidetzarekin eta sagardo dastaketarekin

www.aikotaldea.eus