Isilarazitako herri baten oihua

Izan ginelako, izaten jarraitzen dugu. Baina bidea ez da erraza izan. Izan ginena isilarazten saiatu izan dira boterea dutenak mendeetan eta mendeetan zehar. Herri xehearen aurka eginez, benetako egia bakar bat ezarri nahi izan digute. Historiak ertz asko ditu, baina askotan bertsio bakarren kontakizunak gailendu izan dira.

Historia modu askotara transmititu izan da: ahozko mintzairaz, liburuak idatziz, keinuak eginez, musikaren bidez… eta dantzatuz, jakina. Eta gure kasuan, euskarri guztiak batu dituen ardatz nagusia, gure hizkuntza izan da: euskara.

Hori dela eta, gure herriko historiaren zati garrantzitsuetako batzuk, euskaratik eta euskaraz kontatu nahi dizkizuegu, hitzen eta musikaren bidez dantzatuz, herria eta hizkuntza ez direlako bi bando eta hizkuntzarik ez duen herria ez delako herri izango. Eta dantzaren bidez, gure izatea definitu, eta izan ginen hura gogoratu nahi dugulako, bizi garen oraina ulertzeko. Isilarazi egin nahi izan gintuztenez, oihu egin nahi dugu, isilaraziak izan zirenak omenduz. Izan ere, herri isila herri hila da, eta hori egin nahi izan zutenek ondo zekiten, dantzatzen duen herria ez dela sekula hilko.

Gure omenaldi xume hau, datorren abenduaren 20an, larunbatean, 19:30ean, plazaratuko dugu Beasaingo Usurbe Antzokian, urteroko Gabonetako emanaldiaren baitan. Sarrera doakoa izango da.

Zuen zain izango gaituzue

Ostadar Dantza Taldea