Elkarrekin eta elkarrentzat, jarrai zagun dantzan. Beasaingo Dantza Topaketen XXII. eguna (2024-05-19)

Urteroko ohitura dugu Beasaingo Loinatz jaien barruan, jaietako azken igandean, Ostadar Dantza Taldetik Dantza Topaketen Eguna antolatzea. Urteroko ohiturari segiz, aurtengoa XXII. edizioa izango da, baina aurtengo urtea berezia da gure dantza taldearentzat, hain zuzen ere, dantza taldea sortu zenaren 40. urteurrena delako. 

Lau hamarkada pasa dira Jesus Mari Garate dantza-maisuak, 1984. urte inguru hartan haur eta gaztetxoentzako Ostadar izeneko dantza-talde txiki hura sortu zuenetik. Hori dela eta, aurtengo Dantza Topaketen Eguna, dantza-taldearen ibilbidea hasi, garatu eta jarraipena zubi-lanaren bidez eman dieten guztientzako omenaldia izatea nahi izan dugu. Hori dela eta, jaietako azken igandean, datorren maiatzaren 19an ospatuko dugun Dantza Topaketen eguna berezia izango da, elkarrekin eta elkarrentzat, dantzan egin eta jarraitzeko aldarri bat, alegia.

Hori dela eta, gurekin izango ditugu Ostadar Dantza Taldean azken lau hamarkadetan izan ditugun gaur egungo eta lehenagoko dantzariak, Plaza dantzen ikastaroko kideak, gure etorkizunaren indargune ditugun haurrak, taldea osatzen duten musikariak eta Gasteizko Adurtza Dantza Taldeko lagunak. Hain zuzen ere, gure lagun arabarrak ere beraien 50. urteurrena ospatzen ari dira aurten, eta zer hobe bi ospakizun bateratzea baino elkarrekin dantza eginez?

Egitaraua

Esan bezala, aurtengoa edizio berezia baldin bada ere, urtero bezala, egun osko festa egitaraua eskainiko dugu*.

• 10:45 - Dantzari talde ezberdinak herriko leku ezberdinetatik dantza-kalejiran irtengo dira (Kale Nagusia, Nafarroa Etorbidea, eta Igartza auzotik)
• 12:30 - Dantzari taldeak Erauskin plazan elkartuko dira. Ondoren Kale Nagusian barrena dantzatuko dugu 13:30ak aldera Bideluze Plazan amaitzen dugun arte
• Arratsaldean, berriz, elkarrekin dantzan eta jai giroan, festari jarraipena emango diogu

* Eguraldi txarra egingo balu, goizeko dantza-kalejirak Nafarroa Etorbideko frontoian eta Loinazko San Martin plaza azpian izango dira

Herritar eta dantzazale guztientzako deia

Ostadar Dantza Taldetik herritar guztiak gonbidatu nahi ditugu egunean zehar gurekin batera dantza egin eta ospakizun honetaz gozatzera, herriko Loinatz Jaiak guztiok dantzan behar bezala eta giro onean amaitu ditzagun. Izan ere, herriak sortutako dantzak herriari eskaintzen jarraitu nahi dugulako, gurekin egon zaitezten nahi dugu, guretzako hain berezia den une honetan.

Zuen zain izango gaituzue

Dantzatzen duen herria ez delako sekula hilko, etxean edo plazan, ez jarri zalantzan, jarrai zagun dantzan