Beurko-Bagatzako inauteriak Inauteriak 2018 (Barakaldo)

 Zuberoako Maskaradak eta Momotxorro gaua

Otsailaren 17an, larunbatean, Ibarra-kaldu Elkarteak berriro ere aterako ditu euskal herriko inauteriak Barakaldoko Beurko-Bagatza auzoko kaleetara. Aurten Zuberoako Maskaradak hautatu ditugu, Euskal Herriko herri-inauteririk entzutetsu eta ikusgarrienetarikoa.

 Arratsaldeko 17:00etan hasiko gara, Barrikadekin, Beurko-Bagatza auzoan kalez kale hainbat dantza eginez. Arratsaldeko 18:00etan, ordea, osorik emango ditugu Maskaradak, pertsonaia eta ofizio guztiekin, gainera: entseinaria, txerreroa, gatüzaina, zamaltzaina eta kantiniersa, jauna eta anderea, laboraria eta laborarisa, küküileroak, marexalak, xorrotxak, kerestuak, buhameak, kauterak, etab.

Maskaradetan dantza eta umorezko antzerkia uztartzen dira, eta emankizunean Ibarra-kaldu elkarteko kide guztiek hartuko dute parte, dantzariek eta musikariek, txikienetarik nagusienetaraino, baita txikien gurasoek ere.

 Emanaldia amaitzeko, ikusle guztiak gonbidatuko ditugu azken dantza egitera: Aitzina Pika.

 Eta guztiaren ondoren, 21:00etan, Momotxorro Gaua egingo dugu berriz: jantzi mozorroa eta zatoz gurekin auzoko kaleak girotzera!.

 Zure zain izango gara!