Aurreskua Santa Ageda egunez Sestaon

Santa Ageda bezperaz kantatzea izan zen taldearen lehen ekintzetako bat, horrelako koroak agertzearekin batera, 1957an, taldea bera sortu zenean, Sestaon, Altos Hornos, La Balco eta La General lantegien arteko basaburuan. Garaian, dantza ez zen elkartzeko akuilua, baina, harrezkero, taldeko gizaldi guztietako jendea batzeko eguna izan da beti Santa Ageda bezpera. Hain zuzen, horregatik erabaki genuen 2019an data horren inguruan, urtero taldera dantzara sartzen ziren kide berriekin soka-dantza xume bat egitea, eta aldi berean gure eskualdeko elkarte eta pertsonen bat gonbidatzen genuen, bere lana, edozein arlotako izanik, horretarako zubi izanik, eta denak gonbidatzen genituen sokara eta taldera, jendaurrean abegi egiteko. Lehen urte horretan Sestaoko Emari talde feminista izan zen, hurrengoan Ángel Asensio kulturgizon sestaoartua, eta azkena Aritza Bergara idazle eta musikari sestaoarra.

Egun horretan egiten genuen dantza Durangaldean gorde diren soka-dantzen erakoa zen, baina ordutik aurrerakoa aurresku propioa izatea erabaki genuen; iragan urte gorabeheratsuan ezinezko izan zen dantza sokan egitea bera, eta aurten, abagune txikiena izanda, eta indarberriturik, egun horretarako dantza geure egin dugu. Eta horixe da aurten plazaratu duguna, eta gurera gonbidatu duguna Emilio Xabier Dueñas izan da, baita gure kide berriak ere.

Goizez batu ginen elkarrekin janzteko, Altos Hornos lantegiak beharginentzat eraikitako etxeetan dagoen taldearen lokalean; eta jarraian, eguna hasteko, lokalaren aldamenean dagoen oroigarriaren inguruan, ekitaldi labur batean, hamahiru kide berriei ikurrak emateko, baita ohorezko kideari ere.

Horren ostean San Pedro plazara abiatu ginen, kalejiran, Sestao eta Santurtziko txistulariekin, bertan kideak eta Dueñas jendaurrean gurera gonbidatzeko. Egun horretarako ondutako koplen ondoren, aurreskulari eta atzeskulariak aurrez aurreko dantza egin zuten, eta jarraian biek bere dantza egin zuten. Sokako dantzari guztien banan-banakoa etorri zen gero, eta amaitzeko banango zaharra eginda, sokara sartu ziren guztiak.

Egun ederra izan zen Sestaoko herriko dantza berri bat plazaratuta. Urtean askoan!