Variations Basques. Costumes de fête et de danse

Malandain Ballet Biarritz - Zentro Koreografiko Nazionalak Euskal jantzi tradizionalen inguruko liburua sustatu du bere 20. urteurrenean. Maritzuli Konpainiako jantzi bilduma argitan jarri da Serge Gleizesen testuen eta Veronique Matiren argazkien laguntzaz. Euskal jantzien eta joskintzaren aberastasuna eta edertasuna erakusten da liburuan.

Egilea: Malandain Ballet Biarritz - Zentro Koreografiko Nazionala
Formatua: Liburua
Editorea: Palais
Data: 2019/09/09

Erosi liburua

Euskal jantzien irudiak eta horien sinbolismoa jaso dira liburu honetan testu eta argazkien bidez. Maritzuli konpainiako Claude Iruretagoiena dantza-maisua, jostuna eta euskal jantzien ikertzailearen gidaritzapean, euskal herriko errituei, festei eta dantzei begiratu diete jantzia oinarri harturik. Lau kapitulutan banatu da lana: Prozesio lurraldea; Apaindura gustuko; Igandeetako janzkera, nahasketaren gustua eta Euskal Herriaren xarma isila. Argazki ugariz osatutako albuma, testuak lau hizkuntzatan irakur daitezke: euskara, frantsesa, gaztelania eta ingelesa.

Argazkia: Veronique Mati, Variations basques liburutik.

Lehenengo kapitulua prozesioen munduan murgiltzen da, batik bat, San Martin ezpata-dantzako irudien laguntzaz. Jantzien, apaingarrien, kolorean eta xehetasunak eta detaileak nabarmentzen dira. Maritzuli konpainiaren 20 urteko ibilbidearen laburpena ere kontatzen da. Bigarrenean euskal janzkera tradizionalen aberastasuna ikusten da, egunerokoak zein erritu eta festa egunetakoak. Hirugarrenean igandetako edo egun berezietako arropetan ipintzen da begirada. Horrez gain, Ramon Gartziaren jantzien zentroaren berri ematen da. Azkenengo kapituluan, jantziak Euskal Herriko hirietako arkitekturarekin eta identitatearekin batzen dira.