Hemen zaude: Hasiera Komunitatea Kezka dantza taldea Utah-ko ballet ikasleak euskal dantzak ikasten

Dokumentuaren akzioak

Utah-ko ballet ikasleak euskal dantzak ikasten

2017/06/30 09:00

Utah-ko Unibertsitateko ballet ikasleak astebetez izan ditugu Euskal Herrian euskal dantzen oinarriak ikasten. Guztira, Utahko Unibertsitateko dantza graduko hamaika dantza ikasle ibili dira gure artean. Kezka dantza taldeak bere "etxean", Portalea Kultur Etxean egin dien harrera, eta bertako dantza-gelan, Dantzertin eta Gipuzkoako Dantzagunean jaso dituzte dantza-klaseak.

2017-05-09 13.03.21_r.jpg
Utah-ko dantza ikasleak Sabin Bikandiren eta Patxi Labordaren klasean Dantzertin. Bilbo, 2017-05-09. Argazkia: Oier Araolaza-Dantzan.eus CC-BY-SA

Utahko Unibertsitateko dantza ikaslek Character Dance Ensemble taldean aritzen dira eta urtero tokiko dantzak ikasteko bidaia bat egin ohi dute. Beraien balleteko ikasketak osatzeko tokiko dantza tradizionalek egindako ekarpenei garrantzi handia ematen diote, helburua da tokiko dantza baten ezaugarri propioak eta estiloaren izaera jasotzea.  2008an etorri ziren lehen aldiz Utahko Unibertsitateko ballet ikasleak euskal dantzak ikastera, eta oraingoan beste belaunaldi batek errepikatu du esperientzia.

utahkoak deian
Utah-ko dantza ikasleak Deia egunkariko azalean.

Utahko dantza ikasleak Gipuzkoako Dantzagunean
Utah-ko dantza ikasleak Gipuzkoako Dantzagunean Gari Otamendiren klasean. Errenteria, 2017-05-11. Argazkia: Oier Araolaza-Dantzan.eus CC-BY-SA

Dantzan.com-en koordinaziopean, eta Dantzan Ikasi programaren babesarekin, Kezkako, Dantzertiko, Argia-Ikerfolkeko, Aiko taldeko eta Bilbao Musikako irakasleen dantza-klaseak jaso dituzte Euskal Herrian egindako egonaldian. Gipuzkoako eta Zuberoako dantzak, eta fandango eta arin-arinak landu dituzte gehienbat, eta Gari Otamendi, Josu Garate, Sabin Bikandi, Patxi Laborda eta Oier Araolaza izan dituzte irakasle.

Utah-ko dantza ikasleak Eibarren
Utah-ko dantza ikasleak Josu Garaterekin beroketa ariketak egiten. Eibar, 2017-05-10. Argazkia: Oier Araolaza-Dantza.eus CC-BY-SA

Dantza gelatik kanpo ere bai

Dantza-eskolez gain Euskal Herria apur bat ezagutzeko aukera izan dute amerikar dantzariek. Donostia eta Bilbo hiriburuak, baina baita herri txikiagoak ere bai, eta adibidez, Deban, bertako San Roke ezpata-dantzaren historia eta ibilbidea ezagutzeko aukera izan dute, parrokia eta udaletxe plazatik hasi eta San Roke ermitaraino igoz, eta ingurune ederrak animatuta Santa Katalinaraino iritsiz.

Utah-ko ikasleak Andoni Iriondo Gure Kai dantza taldeko kidearekin
Utah-ko ikasleak Andoni Iriondo Gure Kai dantza taldeko kidearekin. 2017-05-10, Deba. Argazkia: Oier Araolaza CC-BY-SA

Utah-ko dantza ikasleak San Roke ermitara bidean
Utah-ko dantza ikasleak San Roke ermitatik Santa Katalinara bidean. 2017-05-10, Deba. Argazkia: Oier Araolaza-Dantzan.eus CC-BY-SA

Ikasitakoa ikusteko, eta egonaldiari amaiera biribila emateko emanaldi pedagogiko bat osatu dute Kezka, Argia eta Utahko dantzariek. Kezkako eta Argiako dantzariek oholtza gainean dantzatu dituzte ikastaroan zehar landukotako dantzak. Utahko dantzariek, berriz, astean zehar ikasitakoa eta beraiek Salt Lake Cityn duten taldearekin egin ohi dituzten dantzetako batzuk eskaini dituzte.

Kezka dantza taldearen emanaldia Portalean
Kezka dantza taldearen emanaldia Portalean. 2017-05-12, Eibar. Argazkia: Josu Garate CC-BY-SA

Utah-koen emanaldia Eibarren
Utah-ko dantza ikasleen emanaldia Portalean. Eibar, 2017-05-12. Argazkia: Josu Garate-Dantza.eus CC-BY-SA

Egonaldia laburra bezain intentsua izan da. Bertako dantzak ikasteaz gain turismoa egiteko eta Euskal Herriko dantzariak ezagutzeko aukera ere izan dute. Zenbait klase, Dantzertiko, Euskadiko Arte Dramatiko eta Dantzako Goi Mailako Eskolako, eta Dantzan Ikasiko ikasleekin batera jaso dituzte. Etorri aurretik eta orain zer esanik ez, Utahko ballet ikasleek argi daukate euskal dantzak ikastea interesgarria eta aberasgarria zaiela beraien dantzari formakuntzan.

Utah-ko ikasleak Untzaga plaza atzean dutela
Utah-ko dantza ikasleak Untzaga plaza atzean dutela. Eibar, 2017-05-08. Argazkia: Oier Araolaza-Dantzan.eus CC-BY-SA

Erantzun

Erantzuna emateko identifikatu egin behar zara, gure webgunean erabiltzaile bat sortuz edo zure Twitter edo Facebook kontua erabiliz.

Utah-ko ballet ikasleak euskal dantzak ikasten

Utah-ko dantza ikasleak uztaiekin dantzan. Eibar, 2017-05-12. Argazkia: Josu Garate-Dantzan.eus CC-BY-SA

Kezka dantza taldea

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.



Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com