Nori egiten diogu dantza?

2012/04/11 11:30

Aurreskua Iruñean, EHko Itzuliaren abiatze unean, 2017-04-04. Argazkia: Argazkia: Javier Bergasa (Diario de Noticias).

Euskal Herriko Itzuliaren etapa irteera Eibarren. Lehen Euskal Bizikletarekin bezala, orain ere, etapa irteeran agurra dantza egiteko eskaera egiten digute. Badira zortzi-hamar urte protokolo hori egiten dugula. Handik eta hemendik etorritako txirrindulariak pedalei ematen hasteko prest zeudela, haien aurrean jarri, eta agurra dantzatzen genien lehen urteetan.

Euskal Bizikletaren etapa irteera Eibarren (2006).

Aurreskua EHko Itzulia irteera Josu Garate — EH-ko Itzuliaren irteera Eibarren, 2012-04-05. Argazkia: Mikel Larreategi

Orain urte batzuk omenaldi bat egin nahi izan zioten zendu berri zen antolatzaile taldeko kide baten familiari, eta familia, antolatzaileak eta agintariak jarri ziren txirrindularien aurrean. Harrezkero horrela segitzen dute. Omenaldirik ez, baina agintari eta karrera antolatzaileak jartzen dira txirrindularien aurrean aurreskuaren ohorea jasotzeko.

Aurten ere halaxe gertatu da. Josu Garate joan da protokoloarekin kunplitzera, eta Usartzako txistulariak prest albo batean.

Dantzan hastera zihoanean, karrerako zuzendaria eta kirol zinegotzia, azafata pareak lagunduta, jarri dira zintaren aurrean aurreskua jasotzeko. Txirrindulariei bizkarra emanez, eta dantzaren eskaintza beraientzat bailitzan jokatuz.

Aurreskua EHko Itzulia irteera agintariak, antolatzaileak, ziklistak — EH-ko Itzuliaren irteera Eibarren, 2012-04-05. Argazkia: Mikel Larreategi

Karrera antolatzen hainbat lan eta diru jartzen dituztenen ordezkari dira biak, konforme. Baina ez zaigu iruditzen horiek direnik ekitaldiaren protagonistak. Protagonistak txirrindulariak dira. Eta inori dantza egitekotan, iruditzen zaigu txirrindulariei egin behar diegula.

****Eguneraketa (2017-04-05)******

Egunotan Iruñetik abiatu da EHko Itzulia 2017 eta Dugunako dantzariak izan dira aurreskua dantzatzen bertan. Herri eta plaza aldatu da, baina eszena bera: agintari eta antolatzaileak txirrindularien aurrean aurreskua "jasoz", eta Cofidis-eko ziklista harritu bat albo batetik begira zer gertatzen ari den jakin nahirik...

EHko Itzulia 2017 Iruñea aurreskua — Aurreskua Iruñean, EHko Itzuliaren abiatze unean, 2017-04-04. Argazkia: Javier Bergasa (Diario de Noticias).

Dokumentuaren akzioak

Bidali hitzordua

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Sartu

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.

Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com

Tresna pertsonalak

Nori egiten diogu dantza?

Erantzun

Kezka dantza taldea

Jasotako azken erantzunak