Galdakao, Amaña, Goimendi eta... Villach!

2013/06/28 12:33

San Joanak pasa dira, eta udako txanpa betean gaude sartuta. Bihar, larunbata, Galdakaon izango gara Arrateko dantzak eskaintzen. Hurrengo astean Amañako jaien hasieran dantzatuko dugu. Santiago egunean Gomendin soka-dantza ohikoa izaten da. Eta uztaila bukaeran autobusa hartu eta Austriaruntz abiatuko gara, abuztuaren 1etik 4ra Villach herrian ospatzen den jaialdian parte hartzeko.

Udaberriko jaialdiak Galdakaon

Andra Mariko lagunek dantza tradizionala bultzatzeko egiten dituzten lanen artean, Galdakaon bertan hainbat emanaldi antolatu dituzte, eta Udaberriko jaialdiak izendatu duten horretan emanaldia izango dugu bihar. Elgoibarko Haritz dantzari taldeak Gipuzkoako dantzak (soka-dantza eta brokel-dantzaren sorta) eskainiko ditu, eta Kezka dantza taldeak berriz Arrateko dantzak (ezpata-dantza eta trokeo-dantzak).

Haritz eta Kezkak Galdakaon eskainiko dugun Gipuzkoako dantzen emanaldia Galdakaoko Santi Brouard plazan izango da, ekainaren 29an, larunbata, arratsaldeko 20:00etan.

Gipuzkoako Dantzak Galdakaon, Udaberriko jaialdian

Txupinazoa eta dantzak Amañan

Uztailaren 5ean abiatuko dira festak Amañan, eta aurten, Jose Antonio Alberdi "Goma2"-ek jaietako hasiera txupinazoa botatzera gonbidatu du Kezka dantza taldea. Iñaki Barua eta Andoni Altzibar txistulariak izango dira "jaurtitzaileak", beraz, erne inguruetan hauen punteriarekin. Txupinazoaren ondoren dantza saioa eskainiko dugu Amañan bertan.

Goimenditik Villachera

Ohi bezala, Santiago egunean Goimendin izango garela pentsatzen dugu, Azurtzako ermitaren aurrealde eder horretan soka-dantza dantzatzen. Eta handik gutxira, Austriara bidean jarriko gara, Villach herrian ospatzen den Kirchtag jaialdian parte hartzera. Abuztuaren 2 eta 3an eskainiko ditu dantza saioak bertan. Badugu dantzarako aukera uda honetan.

Dokumentuaren akzioak

Bidali hitzordua

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Sartu

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.

Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com

Tresna pertsonalak

Galdakao, Amaña, Goimendi eta... Villach!

Erantzun

Kezka dantza taldea

Jasotako azken erantzunak