Dokumentuaren akzioak

Bidali hitzordua

Ezpata-dantza Jakin taldeari eskainitako Urrezko Dominean

2019/02/01 10:15

Ezpata-dantza Jakin taldeari eskainitako Urrezko Dominean

Ezpata-dantza Gipuzkoako Urrezko Dominaren ekitaldian. Donostia, 2018-12-19. Argazkia: Gorka Bravo - Dantzan CC-BY-SA

Jakin taldeko lau kide historikok, Joan Mari Torrealdai, Joseba Intxausti, Paulo Agirrebaltzategi eta Joxe Azurmendik jaso dute 2018ko Gipuzkoako Urrezko Domina. Abenduaren 19an Donostian, Gipuzkoako Foru Aldundian egindako ekitaldian ezpata-dantzarekin egin zaie harrera, ekitaldi horretan ohikoa den moduan.

Urrezko Dominako ezpata-dantza 2019 — Ezpata-dantza Gipuzkoako Urrezko Dominaren ekitaldian. Donostia, 2018-12-19. Argazkia: Gorka Bravo - Dantzan CC-BY-SA

Gipuzkoa Plazan, Diputazioaren jauregiaren ate nagusitik atera da ezpata-dantza eta segizioak eraikinaren aurrealdetik igarota Peñaflorida kalearekin batzen den ertzeraino iritsi da. Bertan, zain ziren Torrealdai, Intxausti eta Agirrebaltzategi, Markel Olano Ahaldun Nagusiak lagunduta. Azurmendi gaixo izanik ez da ekitaldian izan. Zubiak egin ondoren, azkendariak omenduen aurrean geratu dira eta ezpata-dantza dantzatu dute.

Urrezko domina ezpata-dantza 2009 - 60 — Ezpata-dantza Gipuzkoako Urrezko Dominaren ekitaldian. Donostia, 2018-12-19. Argazkia: Gorka Bravo - Dantzan CC-BY-SA

Ondoren, zubia eginik segizio etorritako bidetik itzuli da jauregiko ate nagusiaren aurrean korrika-txikian zubia prestatu eta azpitik pasata Diputazio barrura sarrera aterpea eginez omenduentzat. Atarian diputatuen ongi-etorria jasota areto nagusira igo dira denak eta Diputatu Nagusia izan da igotzen azkena, ezpata-dantzari kapitainak aurretik zituela.

Usartza txistulari taldearen doinura eta Argia dantzari taldearen zuzendaritzapean, Argia, Haritz, Arkaitz, Dantzerti, Urki, Gure-Kai eta Kezkako ezpata-dantzariek osatu zuten taldea. Txistulariak: Enrike Montero, Elena Perez, Asier Castelos eta German Ereña. Dantzariak: Amaia Loiola, Naiara Ollo, Ainara Aizpurua, Egoitz Irazabalbeitia, Gari Otamendi, Ainhoa Mujika, Maider Callejon, Andoni Alonso, Asier Garmendia, Mikel Legorburu, Igor Baroja, Dairi Martinez Brown, Beñat Urrutia, Elene Carreto, Beñat Arizabaleta, Maddi Argote, Olaia Gabirondo, Egoitz Blanco, Oier Araolaza, Enrike Izagirre, Lore Sarasua, Josu Garate, Lore Alvarez, Jokin Hazas, Amaia Rodriguez eta Garoa Magunazelaia.

Hona hemen Gorka Bravok egindako argazki sortaren albuma:

Ezpata-dantza Gipuzkoako Urrezko Dominean (2018) [argazkiak]

Hona orain arte Gipuzkoako urrezko domina jaso dutenen zerrenda:

1982 Jose Migel Barandiaran.

1983 Manuel Lekuona.

1985 Orfeon Donostiarra.

1987 Eibarko Armagin Eskola.

1991 Carlos Santamaria.

1994 Euskaltzaindia.

1998 Jorge Oteiza, Eduardo Chillida eta Juan Mari Arzak.

2003 Jose Maria Setien, Juan Zelaia eta Iñaki Gabilondo.

2005 Menchu Gal eta kooperatiben sortzaileak: Alfonso Gorroñogoitia, Jose María Ormaechea, Jose María Arizmendiarreta, Luis Usatorre eta Jesús Larrañaga
2005 Xabier Arzalluz, Carlos Garaikoetxea, Jaime García Añoveros eta Pedro Luis Uriarte.

2006 Pedro Miguel Etxenike, Iciar Astiasaran eta Andoni Egaña.

2008 Mikel Laboa.

2009 60ko hamarkadako andereñoak.

2010 Angel Olaran misioilaria.

2013 Nestor Basterretxea (Urrezko plakak: Egin eta Euskaldunon Egunkaria).

2014 Benito Lertxundi (Urrezko plakak: Frankismoan Ordena Publikoaren Auzitegiaren bortizkeria jasan zuten emakumeak eta “Beroa” Gipuzkoako Harrera Familien Elkartea)

2015 Urrezko Plaka: 40ko, 50eko eta 60ko hamarkadetan Espainiar Estatuko herrietatik Gipuzkoara etorritakoei.

2015 Juan Antonio Urbeltz eta Marian Arregi

2016 Ramon Saizarbitoria

2017 Frankismoaren biktimak

2018 Jakin taldea: Joan Mari Torrealdai, Joseba Intxausti, Paulo Agirrebaltzategi eta Joxe Azurmendi

Dokumentuaren akzioak

Bidali hitzordua

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Sartu

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.

Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com

Tresna pertsonalak

Ezpata-dantza Jakin taldeari eskainitako Urrezko Dominean

Erantzun

Kezka dantza taldea

Jasotako azken erantzunak