Dokumentuaren akzioak
Nafarroatik Bizkaira eta Arabatik Gipuzkoara Eibarko Dantzari Egunean
Kezka dantza taldea
Eibarko Dantzari Eguna, Kezka dantza taldea, 2025-06-13. Argazkia: Felipe Loiola - Kezka cc-by-sa
Kezka Dantza Eskolan ikasturtean zehar landutako dantzak plazaratzeko eguna izaten da ustez Eibarko Dantzari Eguna. Azken urteotan lanak pilatzen zaizkigu eta ikasturtean baino azken asteetan presaka atondutako dantzak itxuratzeko nahikoa lan izaten ari gara. Hala ere, irakasleen eta ikasleen sprinak emaitza itxuratzea lortzen du eta tira, aurten ere jaialdi txukuna eskaintzen saiatu gara.
Baztango zortzikoaren plazaratu eta Lekarozeko sagar-dantza eskaini dute Kezkako dantzari gaztetxoek, besteak beste.
Gorularien arku-dantza, Kontrapasarekin agurra eta Gipuzkoako zinta-dantza egin dituzte koskortzen hasitakoek.
Arabako Errioxako dantza sorta txiki bat eskaini dute dantzari gaztetxoek, Ekhi Zugastik, Unai Larreategik eta Pablo Zubiarrek dultzaina eta danborrez jarritako musikaren doinura.
Laster helduekin aritzeko moduan izango diren dantzari gazteek Arrateko trokeo-dantzak plazaratu dituzte.
Amaia Baglietto, Danel de Prado, Roberto Altzerreka eta Iñaki Barua aritu dira txistu eta danborrekin. Hain zuzen, 40 urtetik gora kezka dantza taldeko atabalari aritutako Iñaki Baruari, gure Jaun Barua handiari esker ona agertu diogu.
Durangaldeko dantzari-dantzako agintariena, binangoa, ezpata joko nagusia eta txontxongiloa eskaini dituzte Kezka dantza taldeko dantzariek.
Eta bukatzeko, Adolfo eta Lorea Jainagak trikitixa eta panderoarekin eskainitako jota, porrua eta biribilketarekin borobildu da jaialdia.
Dokumentuaren akzioak
Erantzun
Kezka dantza taldea
Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.
Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.
2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.
Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.
1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.
Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com
Jasotako azken erantzunak
- Dantzan on Dantzaren Nazioarteko Eguna 2022 Eibarren: gogoeta, kronika eta bideoa
- Xabier Etxabe on Dantzaren Nazioarteko Eguna 2022 Eibarren: gogoeta, kronika eta bideoa
- Kezka dantza taldea on Eibarko Dantzari Eguna 2021 online
- Yolanda Urzelai on Eibarko Dantzari Eguna 2021 online
- Kezka dantza taldea on Eibarko Dantzari Eguna 2021 online
- Yolanda Urzelai on Eibarko Dantzari Eguna 2021 online
- Kezka on Bi sarrera zozketan larunbatean Martin Zalakain ikusteko 2017/12/13
- Juana Goikoetxea on Bi sarrera zozketan larunbatean Martin Zalakain ikusteko 2017/12/13
- oier on Aurresku bat Usartzan 1932an 2017/01/19
- Patxi Montero on Aurresku bat Usartzan 1932an 2017/01/19
