Danbolinteroak izango ditugu Ezpalak jaialdiko protagonistak
Hemen dugu Eibarko 49. Euskal Jaia, eta Euskal Jaiaren baitan, Duguna eta Kezka taldeen artean antolatzen dugun Ezpalak dantza tradizionalaren nazioarteko jaialdia. Larunbatean, maiatzaren 24an Iruñean eta Igandean, maiatzaren 25ean Eibarren, Itsasu, Zamora, Cambrils, Stroud (Ingalaterra) eta Berrizko dantzariak eta danbolinteroak izango ditugu Ezpalak jaialdian.
Txistulariak edo danbolinteroak, dantzarion egunerokoan ezinbesteko ditugun musikari-laguntzaile horiek izango dira 2014ko Ezpalak jaialdiaren protagonistak. Txistulariak euskal folklorearen sinbolotzat ditugu, eta jaialdi honetan ikusiko dugu Euskal Herritik kanpo ere txistua eta danbolina biak batera jotzen dituzten musikari horiek ohikoak direla. Itsasutik Xabier Itzaina xirularia etorriko da Ataitze dantza taldeko dantzariekin, Berriztik German Aldekoa txistularia San Lorenzo dantza taldearekin, Cambrils-etik Angel Vallverdu, flabiolairea ball de bastons taldearekin, Zamorako Muelas del Pan-eko dantzariekin Mario Martinez Roncero tamborileroa eta Ingalaterrako Gloucestershire-tik Stephen Rowley pipe and tabor ingelesa jotzen duen taborer-a Alex Merry dantzariarekin.
Eguerdian emanaldia plazan
Igandean, Urkizuko parkean elkartuko dira dantzari eta danbolintero guztiak, eta baita Eibarko Kezka dantza taldeko dantzari eta txistulariak ere bai. Andoni Altzibar, Amaia Baglieto, Iñaki Barua, Jose Migel Laskurain eta Roberto Altzerreka izango dira Kezkako txistulariak. 12.00etan abiatuko da kalejira Urkizutik, aurretik Eibarren txistulari talde eder bat dutela. Izan ere, Eibarren garai desberdinetan txistulari aritutako hainbat lagun bildu dira eta ensegutan aritu dira azken hilabeteetan, eta igandean kalean izango dira, horietako asko hainbat urte ondoren.
Eguerdiko 12:30etan izango da dantza emanaldi nagusia Untzaga plazan. Hauxe da egitaraua:
Hauxek dira jaialdian izango ditugun taldeak:
- Kezka dantza taldea (Eibar, Gipuzkoa)
- Cambrils-eko ball de bastons eta Angell Vallverdu flabiolairea – Tarragona (Katalunia)
- Ataitze dantza taldea eta Xabier Itzaina xirularia – Itsasu (Lapurdi)
- Muelas del Pan-go dantzariak eta Mario Martinez Roncero tamborileroa – Zamora (Gaztela-Leon)
- Feet Together Jump! Stephen Rowley taborer-arekin – Gloucestershire (Ingalaterra)
- San Lorenzo dantza taldea German eta Jon Aldekoa txistulariekin – Berriz (Bizkaia)
Ondoren bazkaria izango da karpan, eta arratsaldean 17.00etatik aurrera erromeria, Aiko taldearekin.
Informazioa: Ezpalak 2014 jaialdia