Dokumentuaren akzioak
Aurreskua sokara itzuli zela 30 urte
Kezka dantza taldea
Eibar, soka-dantza, 1994-06-24. Argazkia: Jose Valderrey
1994ko ekainaren 24an berreskuratu zen aurreskua sokan dantzatzeko ohitura Eibarko San Juan egunean. Eibarko Udalbatzak, Usartza txistulari taldeak eta Eibarko Klub Deportiboko Kezka dantza taldeak plazaratu zuten soka-dantza, 25 urtetik gora San Juan egunez egin gabe egon ondoren. Deportiboko Jose Valderreyk egindako argazkietan gorde da egun hartako testigantza.
Kezka dantza taldearekin batera Usartza txistulari taldea arduratu zen 1994 urte hartan ere musikaz, ondoko 30 urteetan bezala.
30 urteotan aurreskuan izan diren aldaketak agerian jartzen dituzten orduko argazkiek. Adibidez, udaletxe aldeko plazan egiten zen garai hartan eta lehen soka udal-batzak eta Kezkako mutilek osatzen zuten. Kezkako neskak gonbidatu moduan parte hartzen zuten soka-dantzaren bigarren zatian.
Aldatu ez dena euriaren mehatxua da, lehen urteko lurrak eta aterkiek salatzen dutenez, 1994an ere euria egin baitzuen San Juan egunean.
Iazko bi argazki hauek nabarmentzen dituzte izan diren aldaketa horietako batzuk. Asteburua izanik inoizko jendetzarik handiena izan genuen 2023ko soka-dantza ikusten.
San Juan Aurreskua 2024an Eibarren
- 2024ko ekainaren 24an, 23:30ean Untzaga plazan.
- Usartza txistulari taldea eta Kezka dantza taldea.
Dokumentuaren akzioak
Erantzun
Kezka dantza taldea
Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.
Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.
2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.
Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.
1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.
Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com
Jasotako azken erantzunak
- Dantzan on Dantzaren Nazioarteko Eguna 2022 Eibarren: gogoeta, kronika eta bideoa
- Xabier Etxabe on Dantzaren Nazioarteko Eguna 2022 Eibarren: gogoeta, kronika eta bideoa
- Kezka dantza taldea on Eibarko Dantzari Eguna 2021 online
- Yolanda Urzelai on Eibarko Dantzari Eguna 2021 online
- Kezka dantza taldea on Eibarko Dantzari Eguna 2021 online
- Yolanda Urzelai on Eibarko Dantzari Eguna 2021 online
- Kezka on Bi sarrera zozketan larunbatean Martin Zalakain ikusteko 2017/12/13
- Juana Goikoetxea on Bi sarrera zozketan larunbatean Martin Zalakain ikusteko 2017/12/13
- oier on Aurresku bat Usartzan 1932an 2017/01/19
- Patxi Montero on Aurresku bat Usartzan 1932an 2017/01/19
