Arrateko zelaia 2015eko festarako prest

2015/09/04 11:10

Argazkia: Felipe Loiola

Datorren asteartean, irailaren 8an, Arrateko zelaian izango gara berriro ere, hamaikagarrenez, Arrateko Amaren Kofradiako dantzariak. Abuztuko oporrak atzean utzita Arratera begira jarri gara eta aste honetan zehar entseguak egin ostean prest ditugu ezpata, makil, brokel eta abarrak. Aurtengoan, asteguna izan arren, 55 dantzariko taldea batuko gara Arraten zelaia dantzaz betetzeko.

Arrate 2014-2 — Arrate, 2014. Argazkia: Felipe Loiola. Dantzan CC BY-SA

Arrateko zelaiak ikusi ditu jada dantzariak 2015 honetan, atzo, irailaren3an, bertan izan baikinen denok, azken entseguak egin eta zelaiari tamaina hartzen.

Arrate 2015: ensaioa — Arrate, 2015. Argazkia: Oier Araolaza. Dantzan CC BY-SA

Bizkaia eta Gipuzkoako gonbidatuak

Aitor Sorazu Azkoitiako Sahatsa dantza taldeko kidea eta Karmelo Angiozar San Lorentzo dantza taldeko berriztarra izango dira aurtengo gonbidatuak. Bata dantzari gipuzkoarra eta bestea bizkaitarra, bi dantza maisu eta dantzari handiren dantza molde ezberdinak beraz aurten Arraten ikusiko ditugunak. Urtero Euskal Herriko txoko ezberdinetatik Arratera gonbidatzen ditugu dantzariak eta horrela kofradian sartu eta Arraten urtero dantza egiteko aukera izaten dute hauek ere. Aurreko urteetako gonbitatu ugari batzen zaizkigu irailaren 8ro taldera, bailarako dantzarietatik hasi, Euskal Herriko mugetara zabaldu eta ozeanoaren bestaldetik ere egun berezi honetan gurekin batera dantzatzera Arratera datozenak.

Arrate 2012 — Arrate, 2014. Argazkia: Iñaki Zugasti . Dantzan CC BY-SA

Irailaren 8a, jai eguna

Urtero lez 11:00etako meza nagusian eta ondoren datorren prozesioan parte hartuko dugu dantzariok, eliza barruan eta prozesioaren ostean ezpata-dantza eskainiz. Gero, 12:30etan zelaian izango da Arrateko Amaren dantzen erakustaldi osoa, ezpata-dantzarekin hasi eta trokeo-dantzekin amaituz.

Arrate 2014 — Arrate, 2014. Argazkia: Felipe Loiola. Dantzan CC BY-SA

Dokumentuaren akzioak

Bidali hitzordua

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Sartu

Kezka dantza taldea

Herrian bertan egiten diren festak, erritoak eta dantza ekitaldiak ditu Eibarko Kezka dantza taldeak bere lehentasun nagusia. 1958an Eibarko Klub Deportiboaren baitan sortutako dantza taldeak inauterietan koko-dantzekin abiatu ohi du urtea, eta Santa Kurutzetan, San Joanetan, San Andresetan eta bere burua akonfesionaltzat duen herriko santoral egutegiko festa guztietan dagokion dantzaz arduratzen dira Kezkako dantzariak.

Arrateko santutegian ezpata-dantza eskaini ohi du urtero irailaren 8an, tradizioak eguneratu eta antzokia eta plazaren arteko lotura egiteko ahaleginean, Argia dantzari taldeak eszenatokian egindakoaren ordaina plazan errotzeko konspiratuz.

2008an York-en, Ingalaterran, ospatu zen Sword Spectacular, munduko ezpata-dantzen jaialdi handienean euskal ezpata-dantzen ordezkaritza gorpuztu zuen: zahar-itxuran aurkeztutako ezpata-dantza nazioarteko ezpata-dantzen adituei irentsaraziz, ontsa plajiatzeko metodoa aplikatzen denean sorkuntza eta tradizioa txanpon beraren aldeak baitira.

Iruñeko Duguna taldearekin elkarlanean Ezpalak dantza tradizionalaren nazioarteko jaialdia antolatzen du Kezkak, euskaldunok zilborra dugula munduari erakutsiz, eta euskaldunoi munduko zilbor guztiak enbor berera lotuta ditugula iradokiz.

1990. urtean Elgoibarko Haritz dantzari taldearen eskutik Donostiako Argia taldea ezagutzeko zorteak dantzari buruzko etengabeko ikasketan murgiltzera eraman du Eibarko taldea, inoiz bukatzen ez den ikasketa sorgi-gurpilean jira-biran dantzan aritzeko zorionera kondenatuta.

Kezka Dantza Taldea
Portalea Kultur Etxea
Bista Eder kalea
20600 Eibar
Tfnoa: +34 605 71 14 29
kezka@dantzan.com

Tresna pertsonalak

Arrateko zelaia 2015eko festarako prest

Bizkaia eta Gipuzkoako gonbidatuak

Irailaren 8a, jai eguna

Erantzun

Kezka dantza taldea

Jasotako azken erantzunak