Dantza-irudi historiko ederrak sareratu ditu Smithsonianek

XV-XIX. mendetako hainbat dantza ilustrazio eta grabatu digitalizatu eta eskuragarri ipini ditu Smithsonian Institutuak bere webgunean. Munduko museo, hezkuntza eta ikerketa gunerik handienetarikoa da Smithsonian eta bere bildumetan hainbat irudi historiko eder aurki daitezke.

Smithsonianek bere funtsetako 2,8 milioi irudi domeinu publikoan ezarri ditu; sarean dauden irudi horiei Creative Common Zero lizentzia ezarri diete. Aurrez ere bazen irudiak erabiltzeko aukera, baina baimenak mugatuak zeuden. Orain, Smithsonianek uko egin die autore eskubideei, eta irudiak libreki erabiltzeko aukerak zabaldu dira. Horrela, Smithsonianeko funtsetako irudiak kopiatu, aldatu, banatu eta interpretatu daitezke baimenik eskatu gabe, baita merkataritza xedeetarako ere.

Bilatzailean kuxkuxeatzen aritu gara eta dantza irudi ederrak agertu zaizkigu. Gehienak XIX. mendeko ilustrazioak dira, baina irudi zaharragoak ere badaude. Irudiekin batera, hainbat xehetasun jasotzen dituen fitxa teknikoa ere eskura jarri dute. AEB, Frantzia, Italia edota Herbehereetako margolarien lanak aurki daitezke, besteak beste.