Dokumentuaren akzioak
Dantza argazki ederrak GureGipuzkoa.net-en
Arg.: © cc-by-sa Indalecio Ojanguren - guregipuzkoa.net
GureGipuzkoa.net zerbitzu berrian Gipuzkoako Foru Aldundiak argazki bilduma ederra jarri du denon eskura. Argazkiek Creative Commons Aitortu - Partekatu baimenarekin argitaratu dituzte, eta Erabilpen Kultural Libreetarako Baimenduta daudela adierazten da bertan.
XX. mende hasierako hainbat argazki eder bildu dituzte webgune horretara eta tartean badira dantza argazki ederrak ere. Indalecio Ojanguren argazkilari eibartarraren fondoa Gipuzkoako Foru Aldundiaren esku dago eta honen hainbat argazki interesgarri ikus daitezke bertan. Ez ikusi bakarrik, berrerabili ere bai aipatutako lizentziari esker, eta baita argazkiak tamaina desberdinetako eta kalitate on xamarretan jaisteko aukera dagoelako.
Hona adibide batzuk.
Erromeria Elgoibarren. 1956ko San Pedro Eguna Elgoibarren, eta San Pedro ermitaren aurrean erromerian ageri dira dantzariak txistulariaren soinura.
cc-by-sa Indalecio Ojanguren
Erromeria Ixuan. XX. mende hasierako erromeria bat. "Oholtza" gainean trikitilaria eta bi panderojole, eta behean bikoteak dantzan.
cc-by-sa Indalecio Ojanguren
Amuña Eibarren. Manuel Txapartegi "Amuña" aurreskulari zarauztarra Eibarko Untzaga Plazan, 1920ko hamarkadan, San Juan jaietan egiten ziren aurresku txapelketa batean parte hartzen.
cc-by-sa Indalecio Ojanguren
Uztai-handi. Gipuzkoako uztai handien dantza egiten dantzari talde bat. Ez tokia ez data ez dira ezagunak, beraz, inork ezagutuz gero argibide garrantzitsua litzateke.
cc-by-sa Indalecio Ojanguren
Kaxarranka. Debako plazaren itxura du tokiak, San Roke jaietako zezenketetarako prestatzen diren h armailekin, baina konfirmatu gabe dago. Erne ezkerreko etxean, goiko leihotik zintzilik dagoen banderarekin: esbastika bat da.
cc-by-sa Indalecio Ojanguren
Aurreskua Garain. 1933. urtea. Soka-dantza edo erregelak dantzatzen ari dira eta aurreskuak eta atzeskuak banango zaharra dantzatzen diote plazaratu duten emakumeari.
cc-by-sa Indalecio Ojanguren
Ohorezko aurreskua Bergaran. 1930, Eusko Ikaskuntzaren Kongresua Bergaran. Agintarien soka-dantza.
cc-by-sa Indalecio Ojanguren
Horiek dira GureGipuzkoa.net webgune berrian ikus daitezkeen argazkietako batzuk. Bilduma aberatsa da eta merezi du tarte bat hartzea bertan murgiltzeko.
Dokumentuaren akzioak
Erantzun
EDERRAK
Kaixo!
GureGipuzkoako bildumetan Gipuzkoan dauden baina baita ere Gipuzkoaz at dauden makina bat kokapen daude eta horietako asko eta asko ezezagunak zaizkigu, horren ondorioz, argazkien inguruko informazioa motz geratzen da.
Beraz, Gipuzkoako Foru Aldundiko Kultura eta Euskara Departamendutik laguntza eske gatozkizue: Ezagutu ditzazkezuen inguruetako argazkien geokokapenak eta informazio osagarria proposatzerik ba al duzue? Horretarako erabiltzaile bezala erregistratzea baino ez duzue: http://www.guregipuzkoa.net/login/registrationForm.php Eskerrikasko!