Puntaren puntan

Sariekin eta pozez itzuli dira beste behin ere dantzari elgoibartarrak txapelketatik. Emankorrak izan dira beraz pasa den larunbatean Pasai Donibaneko kiroldegian jokatutako Euskadiko VI. Doinu Zahar Txapelketa nesketan eta Euskadiko XXXII. Gipuzkoar Aurresku Txapelketa. Aurreko kanporaketan horrenbeste zorte izan ez bazuten ere, finalean beren maila erakutsi eta podiumera igotzeko aukera izan zuten Arantxa Ferreiro eta Aitor Asenjo Haritz euskal dantzari taldeko kideek, biak hirugarren postuaren jabe egin zirelarik.

<br><br><img src="http://farm9.staticflickr.com/8060/8231675291_6d9b7b96ec.jpg" height="353" width="471"><br><br>Nesken artean Ormatxulo, Upelategi, Kontrapasa eta Hondarribi handia dantzatu ondoren epaimahaiko kideek Nagore Indakoetxea errenteriarra izendatu zuten txapeldun beste behin ere, eta haren ondotik sailkatu ziren Izar Etxeberria Lezokoa eta Arantxa Ferreiro elgoibartarra.

Mutilen sailean berriz Ormatxulo, Desafioa, Kontrapasa eta Zortzikoa izan ziren dantzatu beharrekoak, eta eginbeharrak burututa Atarrabiako Iker Larunberen burura itzuli zen txapela ostera ere. Oiartzungo Iker Sanz geratu zen bigarren postuan, eta Elgoibarko Aitor Asenjok zapaldu zuen podiumaren hirugarren koska.

Honenbestez, txapelketaren goiko mailetan bukatu dute berriro ere dantzari Elgoibartarrek, Arantxaren eta Aitoren postuak buru. Aipatzekoa baita finalera sailkatzerik izan ez zuten dantzarien lana ere, Itziar Aldalur Haritzeko kidea zein Inazio Bereziartua Musika eta Dantza eskolako Andrea Arregi eta Miren Astigarraga elgoibartarrak eta Ixone Juaristi debarra hain zuzen ere. Eta noski, guztiak lanean jartzen dituen Jon Lizarralde Haritzeko kidea ere ezin ahaztu.

Jarraitu bada dantzari elgoibartarron eta Haritz euskal dantzari taldearen izena era horretan zabaltzen! Zorionak!<br><br>