Iraileko aldapak

HARITZ EDT

2011/09/15 19:55

Folklore jaialdiaren 25. urteurrenarekin eman genien ongi etorria oporrei, uztaileko ostiral bero batean. Baina bukatu dira haiek ere, eta iraila, azken urteetan lez, emanaldiz blai iritsi zaigu Haritz euskal dantzari taldera. San Bartolome eguneko soka-dantza tradizionalarekin itzuli baginen lanera, oraingoan azken urteetan hitzordu garrantzitsu bihurtu diren bi zita ditugu aurrean: Lasturko eta Aiastiako emanaldiak. Lasturren izango da horietatik lehena, larunbat honetan, hilak 17, iluntzeko 8etan. San Nikolas festa entzutetsuak ospatzen dituzte auzoan, eta bertako egitarauan tartetxoa izango du aurten ere gure dantza-saioak, Debako Gure Kai taldearekin batera. Hilaren 24an berriz, Elgoibarko Aiastia auzoko San Migel jaien baitan parte hartuko dugu, Murkaikupe frontoian dantzatuz. Ohiko plaza bihurtu da hau ere, eta espero dezagun beste behin auzotarrak asetuta uztea. Errepertorioari dagokionez, bi auzoetan geure-geureak diren Gipuzkoako dantzak eskeiniko ditugu, desafioa edo ezpata txiki bezalakoekin hasi eta zinta-dantza zein uztai txiki modukoetatik pasaz.

Dokumentuaren akzioak