Hemen zaude: Hasiera Komunitatea Haritz EDT Idauze-Mendiko festetan dantzan

Dokumentuaren akzioak

Idauze-Mendiko festetan dantzan

2016/06/09 10:00

Asteburu honetan Idauze-Mendiko festetan izan gara dantzan. Aurrez, otsailean izen ginen Zuberoan eta Idauze-Mendiko dantzariekin batera Maskatrük ekimenean parte hartu genuen. Bertan geundela, herriko gazteek Idauze-Mendiko festetan dantzatzera gonbidatu gintuzten. Eta nola ez, otsaileko harrera eta gero, gutxi pentsatu behar izan genuen baiezkoa emateko!

Idauze-Mendiko emanaldia
Idauze-Mendiko festetan dantzatu genuen zenbait dantzari eta antolatzaile. Argazkia: Nerea Asenjo

Horrela, larunbatean Idauze-Mendira iritsi ginen gure dantzak eskaintzeko asmoz. Etxeandiara gerturatu ahala herriko gazte guztiak lanean ari ziren, karpa txukundu, aulkiak mugitu, gradak jarri... Gu, iritsi eta gure materiala eta erropak prestatzen hasi ginen Idauze-Mendiko gazteek antolatutako dantza emanaldian parte hartzeko. 

Idauze-Mendi: dantza eskola
Idauze-Mendiko dantza eskolako dantzariak. Argazkia: Nerea Asenjo

Idauze-Mendi: Eskiula
Eskiulako dantzariek sorkuntza bat aurkeztu zuten. Argazkia: Nerea Asenjo

Idauze-Mendi: Urdiñarbe
Urdiñarbeko dantzariek sorkuntza bat eskaini zuten. Argazkia: Nerea Asenjo

Dantza jaialdian, Elgoibarko Haritz dantza taldeaz gain, Zuberoako beste zenbait herritako dantzariak ere aritu ziren: Idauze-Mendiko dantza eskola, Eskiulako dantzariak, Ezpeizeko dantzariak, Garindaineko dantzariak, aurten maskaradak eman dituzten Hokiko aitzindariak, Iruri-Zalgizeko dantzariak, Urdiñarbeko dantzariak eta Idauze-Mendiko dantzariak.

Idauze-Mendi: Elgoibar
Gipuzkoako dantzak eskaini genituen Idauze-Mendin. Argazkia: Nerea Asenjo

Idauze-Mendi: Eibarko musikariak
Eibarko musikariak aritu ziren gurekin. Argazkia: Nerea Asenjo

Idauze-Mendi: Garindaine
Garindaineko dantzariak. Argazkia: Nerea Asenjo

Idauze-Mendi: musikariak
Zuberoako musikariak. Argazkia: Isabelle Bouillon

Guk, Gipuzkoako dantzak eskaini genituen, brokel-makilena, zinta-dantza, uztai-haundi eta uztai-txikiena besteak beste eta gurekin batera Eibarko Kezka dantza taldeko musikariak aritu ziren. Dantzari guztiek dantza egin ostean, berriro ere plaza erdira atera ginen eta fandago eta arin-arin batekin amaitu genuen gure emanaldia.

Idauze-Mendi: Hoki
Aurtengo maskaradak eman dituzten Hokiko aitzindariak. Argazkia: Nerea Asenjo

Idauze-Mendi: Zalgize-Iruri
Zalgize-Iruriko dantzariak. Argazkia: Nerea Asenjo

Idauze-Mendi: Ezpeize
Ezpeizeko dantzariak. Argazkia: Isabelle Bouillon

Azken txanpa bezala, jaialdian parte hartu genuen talde guztiek kalejira erraldoia egin genuen eta ondotik Aintzina pika dantzatu genuen. Izerdi guztiak bota ondoren, merezitako mokadutxoa eta dutxa genituen zain. Ondotik, apain-apain, herri afarian izan ginen Zuberoako beste hainbat herritarrekin batera. 

Idauze-Mendi: Idauze-Mendi
Idauze-Mendiko dantzari gazteak. Argazkia: Nerea Asenjo

Idauze-Mendi: kalejira
Dantza jaialdian parte hartu genuen dantzari guztion kalejira. Argazkia: Nerea Asenjo

Hurrengo egunean irribarre batekin bueltatu ginen Elgoibarrera beste behin. Orain, uda ostean, Idauze-Mendiko gazteak gonbidatuko ditugu gure herrira. Horrela, bi herrietako gazteen artean sortu den harreman aberatsa indartzen jarraitu dezagun. Milesker berriro ere Idauze-Mendiko herriari, eta bereziki jaiak eta asteburu zoragarri hau prestatzen aritu diren herriko gazteei!

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Haritz EDT

Haritz EDT

Elgoibarko dantza taldea.

Haritz Euskal Dantzari Taldea

Posta Kutxa: 183

20870 Elgoibar

Tfnoa: +34 686 63 31 78

haritz@dantzan.com

 

Twitter: @haritzedt