Edukira salto egin | Salto egin nabigazioara

Tresna pertsonalak
Hemen zaude: Hasiera Komunitatea Haritz EDT Elgoibarko Nazioarteko XXIX. Folklore Jaialdia

Dokumentuaren akzioak

Elgoibarko Nazioarteko XXIX. Folklore Jaialdia

2015/07/21 11:30

Datorren ostiralean, uztailak 24, Elgoibarko Nazioarteko XXIX. Folklore Jaialdia egingo dugu iluntzeko 22:30ean Olaizaga kiroldegian. Haritz dantza taldearekin batera dantzatuko duten aurtengo talde gonbidatuak Kubako Camagua eta Zeelanda Berriko Nga Uri Te Wai-o.Taiki izango dira. 

Jaurrieta 04Jaialdiari hasiera Haritz dantza taldeko kideek emango diote Zaraitzuko hainbat dantza eskainiaz. Lehenik, neskek Jaurrietako herrian dantzatzen den Axuri-beltza edo nesken esku-dantza dantzatuko dute. 1969ko maiatzaren 4an estreinatu zuen Argia dantzari taldeak dantza hau. Azkuek bere kantutegian jasotako doinu bat oinarritzat hartu eta hura berreginda sortu zuten Juan Antonio Urbeltzek eta Marian Arregik Axuri-beltza dantza kantatua.

Zaraitzun bertan, Otsagabian, egiten diren dantzak eskainiko dituzte ondoren taldeko mutilek. Irailaren 8an, Muskildako Ama Birjinaren omenez ospatzen den festan eskaintzen dute Otsagabiako dantzariek beren urteko emanaldi nagusia. Bertan, Pasacalles, Jota, Modorro, Katxutxa, Pañuelo dantza, Emperador eta Dantza dantzatzen dituzte. Haritzeko dantzariok Otsagabiako dantzarien laguntza izan dugu aurten dantza hauek prestatu ahal izateko.

Zeelanda Berriko talde maoriak bere herrialdeko kultura eta tradizioak ezagutarazten ditu dantzaren bidez. Lurrarekin lotura handia du taldeak: taldekide gehienak jaio eta hazitako tokiaren inguruan dagoen ibaiarekin dute lotura, eta handik hartu zuen taldeak izena. Literalki ondorengoa esan nahi du: Wai-o-taikiren ondorengoak. Taldekideek instrumentu indigenak erabiliko dituzte euren musiketan, eta herrialdeko kultura-aberastasunean oinarritutako kanta eta dantzak eskainiko dituzte.

Kubako Camagua taldea 2011n sortu zen, 1981ean Fernando Medranok sortutako Maragun elkartetik. Izan ere, elkarte hartan aritzen ziren gaur egun Camaguan dauden musikari eta dantzari gehienak. Camagua taldeak Kubako doinu tropikala Afrikako ekarpenekin uztartzen du. Irribarre zabalak, eta bereziki, Karibeko tradizioan murgiltzeko aukera eskainiko digute, ikusi eta entzutekoak izango diren doinuekin.

Jaialdiari amaiera emateko, Lapurdiko dantzak egingo ditu Haritz dantza taldeak. Haritzeko dantzariei Betti Beteluk irakatsi zizkien duela zenbait urte, eta aurten Claude Iruretagoienarekin errepasatu eta berriak ikasi dituzte: Makeako soka-dantza, Xinple, Marmutx, Makil-dantza, Gabota, Dantza luze soka, Bizar dantza eta Betti Betelu berak prestatutako fandangoa.

Elgoibarko Nazioarteko XXIX.Folklore Jaialdia

  • Uztailak 24 ostirala, 22:30ean Olaizaga kiroldegian. (Ateak 22:00etan irekiko dira).
  • Taldeak: Kubatik CamaguaZeelanda Berritik Nga Uri Te Wai-o.Taiki eta Elgoibartik Haritz dantza taldea.

Dokumentuaren akzioak

Erantzun

Erantzuna emateko identifikatu egin behar zara, gure webgunean erabiltzaile bat sortuz.

Haritz EDT

Haritz EDT

Elgoibarko dantza taldea.

Haritz Euskal Dantzari Taldea

Posta Kutxa: 183

20870 Elgoibar

Tfnoa: +34 686 63 31 78

haritzdantza@gmail.com

 

Instagram: @haritzedt