Foruko erregelak
Uztailak 31, hileko azken eguna eta plan ezin hobea gaurko egunerako. Foruko erregelak ikustera abiatu naiz. Busa hartu, herrira heldu eta herriko taberna batean hamaiketako goxo baten ondoren hurbildu naiz herriko plazara. Lekua hartu eta herritarren ondoan eseri naiz dantzari eta musikarien esperoan.
13:45ean elizako kanpaiak jo eta segidan txistuak entzuten hasi dira. Kale barrenatik kalejiran etorri dira txistulariak, alkate eta aguazila, dantzariak eta gainerako herritarrak.
Plazan sartu eta alkate eta aguazilez jantzita doazen bi mutilak banku batean eseri dira. Bankuari begiratu eta izkina bakoitzean bi ikur dituzte, alde batean ikurrina eta bestean, Foruko bandera. Haien ondoan 5 txistulari kokatu eta jarraian bi dantzari hurbildu dira alkatearengana. Dantzatzeko baimena eskatu diote alkateari eta jarraian aguazilak lekutik altxa eta makila batez lagunduta dantza lekua markatu du plazan.
Behin dena prest, txistulariak lehenengo notak jo eta dantzariak dantzara abiatu dira. 8 mutilez osatutako ilaran kokatu eta aurreskulariak lehenengo jauzia egiterakoan sokan elkartu dira dantzari guztiak. Zortziko berria niretzako ikusten eta entzuten dudan hau. Zati hau amaituta aurreskuak “Erregela” dantza pieza eskaini digu; bitartean, sokako bigarren eta azken-aurreko dantzariak “zerbitzari” papera hartuta, neska baten bila joan dira, eta baserritarrez jantzitako emakume bat plazaratu dute. Harrituta geratu naiz, ordura arte ikusitako erregelekin konpara ezina izan da aurreskuak egindako dantza. Zoragarria!
Behin emakumea plaza erdian kokatuta, aurreskulariak “kontrapas” dantza eskaini dio. Behin amaituta emakumea eta aurreskulariak zubi bat sortzen zuten bitartean eta dantzari guztiak haien azpitik pasatzen ziren bitartean, plaza txaloz bete da. Zubia desegin ondoren atzeskuaren txanda heldu da; eta “erregelen” zatia dantzatu du. Bitartean, “zerbitzariek” jokabide berdina egiten dute; oraingo honetan emakumea gaur egungo jantzi zibilekin doa. Atzeskuak “kontrapas” dantza eskaini, bion artean zubia egin eta berriro aurreskua sokaren aurrean geratu da.
Erregelarekin amaitzeko aurreskuak berriro “zortzikoa” dantzatu du; amaiera borobila emanez. Zati hori burutzen ari den bitartean “zerbitzariek” beste hainbat emakume atera dituzte plazara; sokan sartu dira eta behin guztiak sokan lotuta daudenean, biribilketa txiki bat egin eta emanaldi honi amaiera emateko fandango eta arin-arin bat dantzatu dute. Plaza berriz txaloz bete da eta herritarren poztasunarekin plazan dantzatu duten guztiek biribilketa alaitsu batean joan dira.
Gorputzean geratu zaidan poztasunarekin bueltan joan naiz busera.
Segi dantzan Forua!