Bi soka-dantza egun berean, Gaztedi omentzeko eta Aberri egun bateratuaren alde

Aspaldi samarretik lotua genuen martxoaren 28ko emanaldia Bilboko Loraldia jaialdiaren baitan. Santutxuko Gaztedi dantza taldeak 75. urteurrena ospatzen ari baita eta bi taldeon hamarkadetako harremana gogoan, elkarrekin dantzatzeko gonbidapenari nola ezetz esan?

Baina duela zenbait aste, Euskal Herria Batera ekimenetik ere dantzatzeko galdea izan dugu. Aberri egun bateratua aldarrikatzeko urteroko ekitaldia antolatuko dutela Lizarran eta azken urteotan ohiturazkoa bilakatu den soka-dantza abiatuko ote dugun. Noiz eta martxoaren 28an. 

Bi emanaldiak ezin galtzeko horietakoak iruditu zaizkigunez, hortzak pixka bat estutu eta bi emanaldiak antolatzea eta ematea delberatu dugu. 

Bilbokoak eskatu digu logistika lan handiagoa. ordu t'erdiko saioa baitugu Gaztedikoekin erdi bana. Santutxuarrek Bizkaiko dantzak oinarri dituen lehen partea eman dute, hasteko. Ondotik gure txanda. Trokeo-dantza guztiak prestatu eta plazaratu ditugu lehenbizi —menu trinkoegia agian—  Alondigako plaza berezian: Bi makila-txikienak, bi makila-handienak, ezpata-brokelena, arku-dantza eta zinta-dantza.

Kasik hatsari buelta emateko denborarik gabe, Aitor, Eder eta Julen txistularien doinuei segiz atera dugu soka plazara. Ikusleak agurtu, axeri-dantza eman eta Gaztediko lagunak gonbidatu ditugu dantzara, haien urteurrena ospatzeko elkarrekin dantzatzea baino modu hobeagorik ez dagoelakoan. 

Bilbon soka-dantzan ari izan garen momentu beretsuan abiatu izanen da ere Lizarrako soka. Aurreko urteetan Portugaleten eta Donostian nola, bertaratutakoen soka-dantza baten bitartez eman diote hasiera ekitaldiari. Zorionez, Ega ibai ertzeko hirian ateri da eta kalean egin ahal izan da soka-dantzaren errituala. Sokara batu dira besteak beste Mikele Agirre eta Irantzu Zabalza, Fortunato Agirre zenaren alaba eta biloba, Ekhi Atorrasagasti, Carlos Etxepare eta Xabier Euskitze Euskal Herria Baterako kideak, Estitxu Garai EHUko errektoreordea, eta Unai HUalde, Maddalen Iriarte, Miren Zabaleta eta Xabier Alkuaz politikariak. Bilbon eta Lizarran bitan banatu ahal izan gara, besteak beste gure musikarien borondate onari esker eta Igor Martinez eta Leire Retegiren laguntzari esker.

 Gero, Los Llanos zinema barruan gertatu da ekitaldi instituzlionala eta han ere izan da dantzarik, Lizarrako dantzarien eskutik.