Orain arteko ekarpenak

Askotan deitu edo idazten digute halako dantza taldearen telefonoa edo bestearen emaila eskatuz. Batzuetan ez da erraza gertatzen dantza taldeokin kontaktuan jartzea. Horregatik euskal dantza taldeen direktorio bat sortzea pentsatu dugu. Baina direktorio horretan bakoitzak erabakiko du zein datu eman nahi dituen. Sartu dokumentuan eta zure taldearen kontaktua erraztu nahi baduzu bete laukitxoak.

Aukeran dantza konpainia lan berria prestatzen ari da. Gernika margoa izango du ardatz eta ekainaren 10ean Euskalduna Jauregian egingo den "Euskaldunak eta dantza" jaialdian egingo dute ikuskizun berriaren aurrerapena.

Lagun batek bidali digu ondoko argazkia. "Erotismoa, dantza, sadoa... Dantzan.com-eko logoa gogoratu dit, bide batez" esan digu. John Tisbury-ren irudi bat da, argazki erotiko, fetitxista eta biluzi artistikoetan espezializatutako argazkilaria da.

Aspaldi agortutako liburua da Sagasetak Luzaideko dantzen inguruan idatzi zuena. 1977an argitaratu zen eta Luzaide zein Nafarroa Behereko dantzetarako erreferentzia onena da ordutik. Baina liburua, agortuta dagoenez, ez da erraza eskuratzea. Horra bolantak ikustera joan aurretik irakurtzeko liburu mamitsua, pdf formatoa, edonoren eskura.

Arte eszenikoen Max sariak banatu dira Las Palmas de Gran Canariako Cuyas antzokian eta dantzarien eskutik bi sari eskuratu dituzte artista euskaldunek. Damian Muñoz-ek dantzari interprete onenaren saria eskuratu du eta Kukai-Tanttakak errebelazioa saria.

Mikelats taldearen 15. urteurrenaren ospakizunekin bat eginez irailaren 12an Atarrabian ospatuko da EDBk antolatzen duen Euskal Herriko Dantzari Eguna.

Dantza eta antzezpena nahasten dituzten herri antzerki hauen ezaugarrietako bat da satira eta kritika soziala, urtean zehar herrian gertatu diren pasadizo bitxiak gogoratzeko orduan erabiltzen dena. Iaz Ribaforadako dance-an botatako bertsoetako zenbaitzuk ez dira politikarien gustukoak izan eta aurtengo paloteadoa arriskuan da. Eskuineko zutabean jaso ditugun bideoak 2007ko Monteagudoko paloteadokoak dira, Youtuben argitaratuta daudenak.

Inauteriak Lantz-en, inaute asteartean. Arotzak kaleetan, eta Ziripot jantzi ondoren ostatutik atera dira txatxoak, zaldikoa eta Miel Otxin txistulariak lagunduta. Herriko kaleetan kalejira egin ondoren plazan zortzikoa dantzatu dute. Hona 2009ko otsailaren 24an Lantz-en ospatutako inauteri eta dantzatutako zortzikoaren bideo eta argazkiak.

Pasa den martxoaren 1ean Burgaintziren Kabalkadak hartu zituen Donapaleuko kaleak, eta Paisola idek! libertimendua eskaini zuten Kitzikazank antzerki taldearen eskutik herriko plazan. Hona ekitaldiaren bideo-laburpen bat eta argazki sorta bat.

Inauteri igandean, arratsaldeko 17.00etan abiatu da karnabaletako konparsa Zalduondon. Lazarragarren etxetik atera dira mozorroak eta musikak lagunduta kalejira ederrean egin dute herri osoaren itzulia. 2009ko otsailaren 22an Zalduondon ateratako argazki sorta.