Maritzuliren Zeina erakusketa Baionako kalostran irailaren 3tik 29ra

Maritzuli Konpainiak Kaskarotak, Bolantak, atzoko eta gaurko dantzariak erakusketa aurkeztuko du Baionako Kalostran irailaren 3tik 29ra. Guztira 120 jantzi bilduko ditu erakusketak, eta Lapurdiko dantzarien historia eta gaur egungo transmisioa uztartu dira.

Nortasun indartsu baten lekuko eta eramaile diren gaur egungo kaskarotak mendeetako tradizio baten oinordeko eta aldi berean eragile dira. Haien aurrekariak ugariak izan dira historian zehar, betiere Lapurdiko jai eta erritualen egutegiari lotuta.

Antzinako bidaiarien kontakizunek eta hainbat lekukotasunek figura horien inguruko ikerketa zabala egiteko aukera eman diote Maritzuli Konpainiari. Horren emaitza da lehen aldiz aurkezten den ibilbide historikoa, iraganeko eta gaur egungo dantzariak lotzen dituena.

Atzoko eta gaurko dantzariak erakusketa berean

Erakusketak 1530ean Austriako Eleonore Frantziako erreginari Baionan egindako harreratik abiatu, eta XX. mendearen hasierako Uztaritzeko kaskaroten taldera eramango du bisitaria. Horrez gain, Luis XIV.aren ezkontzaren garaian Donibane Lohizunen aritu ziren crascabillaires dantzariak ere izango ditu hizpide. Lapurdiko dantzarien genealogia berria hiru hizkuntzatan aurkeztuko da —euskaraz, frantsesez eta gaskoiz—, eta Nafarroa Beherea eta Bigorra eskualdeari ere begiratuko die.

Gaur egungo dantzariak ere izango dira erakusketaren parte. Haien jantzien bidez gaur egungo gogoeta sozialak azaleratuko dira, eta dantzariaren generoari edo ez-generoari buruzko ikuspegia ere landuko da, iraganeko praktikak eta gaur egungo kultur eragileen arteko loturak azaldu eta hausnarketarako gakoak eskaintzeko.

Ondarearen Europako Jardunaldien harira, bisita gidatuak ere antolatuko dira:

• Irailak 19, larunbata, 10:00etan, frantsesez.
• Irailak 19, larunbata, 15:00etan, euskaraz.
• Irailaren 20, igandea, 15:00etan, frantsesez.

Bisita gidatuetan gehienez 25 lagunek parte hartu ahal izango dute. Izen-ematea Baionako Udalaren bidez egin beharko da.

Kaskarotak, Bolantak: atzoko eta gaurko dantzariak

• Non: Baionako Kalostran
• Noiz: Irailaren 3tik 29ra

Ordutegia

Irailaren 3tik 20ra

• Asteartea–larunbata: 09:00-12:30 / 14:00-18:00
• Igandea: 14:00-18:00

Irailaren 21etik 29ra

• Asteartea-larunbata: 09:00-12:30 / 14:00-17:00
• Igandea: 14:00-17:00