Zuberoako Maskarada Parisen antzeztuko dute

Hiriburuko Euskal Etxeak eraman du aurrera ekimena, bertan bizi diren euskaldunei eskaintzeko

Egilea

Kepa Urbieta

Komunikabidea

Berria

Tokia

Donostia

Mota

Albistea

Data

2006/06/01

Ikuskizuna Parisen egiteak badu helbururik: batetik, Frantziako hiriburuan Euskal Herriko kulturaren zati bat ezagutzera ematea. Bestetik, beste erkidegoek ere jaialdiaz gozatzeko aukera izatea. Euskara ulertzen ez dutenentzako liburuxka batzuk prestatu ditu Euskal Etxeak. Ekainaren 17an izango da, Chiquito de Cambo izeneko frontoian. 16:30ean hasiko da, eta guztira hirurogei bat lagunek hartuko dute parte.

Maskarada urtero antolatzen da Zuberoan, ezberdintasun batekin: antolatzaileak. Aurten Urdiñarbe herriko gazteei egokitu zaie. Urtarrilean aurkeztu zuten lehenengo aldiz, eta ordutik Zuberoako herriak zeharkatu dituzte.

Maskarada bi talde ezberdinen arteko liskarrean oinarritzen da. Alde batetik gorriak daude. Jantzi dotore eta argiekin, dotoreziaz dantzatzen dute. Bestetik, beltzak. Horiek dohatsuak eta tristeak dira, eta dantza inolako ordenarik gabe egiten dute. Amaitzean, ikusleek eta antzezleek Mutxikoak dantzatuko dute. Beraz, musika, dantza, eta antzerkia uztartzen dituen ikuskizuna da.

GASTRONOMIA ERE BAI. Maskaradaz gain, euskal kulturaren beste arlo batzuk ere erakutsiko dira: pilota partidak jokatuko dira, dantzak erakutsiko dituzte eta Euskal Herriko gastronomia dastatzeko aukera ere eskainiko dute.

Dokumentuaren akzioak

Bidali hitzordua