Igandean, apirilaren 30ean, Xiberuko Botzak prestatu duen irratsaioa entzun ahal izango da bailarako bost udalerrietan
Jelki eta jin zaitez leloarekin Zuberoako maskaradak emango dira Aiztondon datorren maiatzaren 7an. Ekimena girotzeko, igande honetan, apirilak 30, Xiberuko Botza irratiak prestatu duen irratsaioa izango da entzungai Aiztondoko bost herrietako plazetan. 12:00etatik 14:00etara entzun ahal izango da Asteasun, Zizurkilen, Larraulen, Adunan eta Alkizan eta baita ere ATARIA irratiaren sintonian. Aiztondoko maskaraden gainean irratsaio bat propio prestatu du Zuberoako euskara hutsezko Xiberuko Botza irratiak.
Egilea
Jon Miranda Labaien
Komunikabidea
Tolosaldeko ataria
Mota
Albistea
Data
2017/04/26
Lotura
Tolosaldeko ataria
TXARTELAK SALGAI
Maiatzaren 7an jokatuko dituzte maskaradak Zuberoako Pettarra eskualdeko gazteek Aiztondon. Bezperan iritsiko dira eta Asteasun egingo diete lehen harrera. Gauean afaria egingo da Usarrabi frontoian. Igandean, goizean zehar herriz herri barrikadak egin ondoren, Larraulgo frontoian bazkari herrikoia egingo da, bertako plazan maskarada jokoak eman aurretik.
Larunbateko afarirako (15 euro helduek, 8 euro 14 urtetik beherakoek) eta igandeko bazkarirako (12 euro helduek, 10 euro 14 urtetik beherakoek) sarrerak salgai dira Aiztondoko ostatuetan.
