Zortzi obra aukeratu dituzte Estreina 2010 erakustaldirako

Nafarroako antzerki eta dantza ekoizpenentzat zegoen zabalik lehiaketa, eta aukeratuen artean ez dago euskarazko lanik

Erakustaldiko aurreneko emanaldiak Fueradeleje konpainiaren Las cuatro estaciones eta Aldanza konpainiaren Carrousel obrenak izango dira, apirilaren 12an biak. Ondorengo egunetako egitaraua honela osatuko da: Pasadas las 4 konpainiaren Juegos de niños, eta Carmen Larrazen Vía4, hilaren 13an; Pablo del Mundilloren El mundillo pirata eta Solita Intencioneren Me lo hago sola, hilaren 14an; Trokoloren El sueño de una noche de verano eta La Naveren La Reme tenía un precio, hilaren 15ean.Eguneko lehen emanaldia 17:30ean izango da, eta bigarrena 20:00etan.

Iruñeko Udalak eta Nafarroako Antzokien Sareak antolatu dute Estrena 2010 Antzerki eta Dantzako I. Erakustaldia, sare horren katalogoko antzerki eta dantza obrak udal antzokietan eman daitezen bultzatzeko asmotan.

Nafarroako antzerki eta dantza ekoizpenentzat zegoen zabalik lehiaketa, eta obra guztiek 2009an edo 2010ean estreinatuak edo Estrena 2010 erakustaldiko emanaldian estreinatzekoak izan behar zuten.

Aurkeztutako 26 lanen artean emango diren zortziak hautatu dituen epaimahaia lau lagunek osatu dute: Rafael Campos, Zaragozako (Espainia) Principal antzokiko gerenteak; Ana Zabalegi, Gaiarre Antzokia Fundazioko gerenteak; Alex Ruiz Pastor, Nafarroako Antzoki Sareko gerenteak; eta Idoya Monje Iruñeko Udaleko Kultura Saileko teknikariak.