Gaur abiatuko den Zinetika jaialdiak bere zortzigarren edizioa egingo du abenduaren 14ra bitartean, eta dantza, zinema eta teknologia fusionatuko ditu. Lau egoitzatan plazaratuko ditu sormenak: Iruñea, Donostia, Bilbo eta berritasun gisa, zinemaldia Mayennera (Frantzia) zabalduko da.
Diziplina anitzeko jaialdi honen egitaraua ere anitza da, eta makina bat ikuskizun eta zortzi herrialdetako filmak bilduko ditu. Iruñeko Kondestable Jauregian Ponten Pie konpainiaren Ârtica obra ikusgai izango da; bertako patioan eraikitako etxola batek “ikuslea abentura sentsorial batera eramango du”. Egun berean, bisitariek Laida Aldazen To Let Go instalazioa esploratu ahal izango dute. “Ikusizko poesiari buruzko bi liburu handi, lau pantaila txertatuta dituztenak. Irudiek ezin joaten uztea islatzen dute, eta zehazteko dagoen performance bat”. Horrez gain, Ione Atenea nafarrak emango du masterclass bat Munduarekin harremanak izan kameraren bidez izenburupean.
Donostian David Espinosaren Historia unibertsal bat performancea ikusiko da, “gizateriaren historiako une esanguratsuen bira bat egitera gonbidatuko gaitu”. Beste aldetik, Vera Mantero nazioarteko artista entzutetsuak Os Serrenhos do Caldeirão, fikziozko antropologia ariketak performancea aurkeztuko du; “Portugalgo Algarveko Serrenhos do Caldeirãoko denboran galdutako landa-bizitzaren jakinduria aztertzen du”.
Aurtengo edizioko Sail Ofizialean gaur egungo bideo-dantzarekin zerikusia duten filmik onenak pantailaratuko dira. Zortzi herrialdetako hamabi filmek hartzen dute parte zinemaldiaren egoitza bakoitzean, film eta zuzendari onenaren sariak lortzeko lehian.
Sariok emango dituen epaimahaia Ione Atenea zinemagileak, Rosa García Loire ikus-entzunezko zuzendari eta ekoizleak, eta Marta Coronado dantzari, koreografo eta La Faktoria Zentro Koreografikoko zuzendariak osatzen dute.
“2023ko Zinetika Festivalek dantzaren, zinemaren eta teknologiaren arteko elkargunea aztertzen duen esperientzia paregabea izango da.”
