Xarnegutarren pastorala Inesa de Gaxen biziberritzear da

Inesa de Gaxen pastorala aurkeztu du astearte honetan, apirilak 16, egitasmo honetarako sorturiko Xarnegu Pastorala Sharnèga elkarteak. Ekainaren 15 eta 16an Bastidan eta irailaren 21 eta 22an Bardozen eskainiko dute pastorala. Xarneguko bederatzi herritako idazle eta aktoreen presentzian, euskaraz eta, lehen aldiz, gaskoieraz antzeztuko den pastoralaren izaera berezia azaldu dute.

Itxaro Borda idazleak eman dio istorioari bizia, Yvan Bareyre gaskoierazko testuen itzultzaile eta egilearen laguntzarekin. Eszenaratzea Pantxika Urruty errejentaren esku izan da, Gaxengo Inesa gaztearen bizi istorioa landu duena 2017az geroztik. 1566an Bastidan sortu zen emazte honen patuak lotura estua du Bidasoaren bi aldeetan XVII. mendearen hastapena markatu zuten erlijio-jazarpenekin.

14 urte zituela, 1580an, sorginkeriagatik salatu zuten. Urtubiako jaunak Hendaian atxilo hartu zuen gaztea, eta 18 urte bete arte ez zuten askatu, orduan Akizeko apezpikuak zuritu baitzuen. Irunen atzeman zuen aterpea, eta han Pedro de Sanza Hondarribiako soldaduarekin ezkondu zen. 1611n sorginkeria leporatu zioten berriro. Akusazioak gorabehera, irmo jarraitu zuen eta berriz errugabetzea lortu. Hala ere, erbestera behartua izan zen, Bidasoko ontzi batean. Gaxen Inesaren azken patua misterio bat da oraindik...

Sartzeak eskuragarri

Francis Dagorret herriko auzapezak eginen die harrera Arceles plazan izanen diren lehen emanaldiei. Gogotsu da: «duela urte batzuk zalantzan nuen horrelako proiektu baten bideragarritasuna. Gaur egun, onerako harritua naiz», erran du pastoralean auzapezaren papera jokatzen duenak. «Horrelako proposamenak aurkezten direnean, onartu beste erremediorik ez dugu», dio Bardozeko auzapez Maider Behoteguyk, pastoralari herriko estadioan harrera eginen baitio.

Lau emanaldiendako sartzeak eskuratzen ahal dira jadaneko elkartearen helloasso plataforman.