Xabier Itzainak ttunttuneroen gizartea aurkeztuko du Maulen

Xabier Itzaina historialari eta antropologoa Frantziako Zientzia Ikerketarako Gunean (CNRS) ikerlari da Bordeleko Emile Durkheim zientzia politika zentroan. Duela guti, 'La societe du tambourin' liburua argitaratu du eta horren karietara, hitzaldia emanen du Maulen. Hebentik Xiberoako arte herrikoia eta sorkuntza gunearen egoitzan iraganen da txistua eta danbolina momentu berean jotzen dutenei buruzko hitzaldia, abenduaren 2an, 18:00etan. Euskaraz izanen da frantsesezko itzulpen zuzenarekin eta sartzea dohainik izanen da. 

‘Ttunttuneroen gizartea, Ipar Euskal Herriko dantzarako soinularien historia sozial bat’ hitzaldian, Ipar Euskal Herrian diren soinulari edota soinu egileen historia soziala aurkeztuko du itsasuarrak. Lehenagoko lekukotasunak eta artxibo materiala erabiliz, denboran zehar soinu tresnak, soinularien betebeharrak eta soinulariek gizartean zuten tokia aldatuz joan direla azalduko du.

Hitzaldiaren oinarri den ikerketa Lapurdi eta Baxe Nafarroan eremana izanik ere, Xiberoako adibide eta ikerbide batzuk aipatuko ditu. Hitzaldia eta gero denen artean trago bat hartzea proposatua da.