Urdiain: bost kinto, eta gehiago, festarako prest

Gaur bazkaltzera elkartuko dira bost kinto urdiaindarrak. Eta haiekin batera, kinto gazteak, kinto zaharrak eta beti-kintoak. Mahaitik jaso eta gero, trikitilariak aldamenean dituztela, herrian barna axuri baten zozketarako txartelak saltzen ibiliko dira. Hori dute kinto festako gastuak ordaintzeko moduetako bat. Afaldu eta gero frontoi azpiko lokalean, antroan, parranda eginen dute. 

Larunbatean, antroan bertan bazkalduko dute eta handik aterata zozketarako txartelak saltzera baserrietara joanen dira. Trikitilariek jota eta porrusalda jo eta haiek aire horiek dantzatuko dituzte. Afaldu ondoren herriko gainontzeko kintadekin parranda egin edo Altsasura joan erabakiko dute. 

Domekan kintoak gosaltzera elkartuko dira. Eguerdiko mezaren ondoren, 12:30 aldera, kintoak eta bi kinto gazte (Beñat Mendez eta Euken Perez) plazara aterako dira eta Zortzikoa dantzatuko dute. Egiteko horiek despedituta herriaren erdia diru eskea eginen dute. Bazkaldu ondoren, beste erdiaren txanda izanen da. Egiteko horretan ere musika lagun izanen dute. Afaldu ondoren ospakizuneko azken juergari ekinen diote.