Udalbatzaren aurreskuak emango die hasiera herriko festei gaur arratsaldean

Ekitaldi berean, Oinarineko neska-mutikoek ikurrin dantza egingo dute. Aurten hasitako umeen kaleko aurreneko saioa da. Antzuolako bandera eta ikurriña ere jasoko dira udaletxeko balkoian. Hontzaren jaitsiera, berriz, gaueko hamaika eta erdietan jarri dute. DYAko lagunek emango diote ongi-etorria Hontzari aurten. Elkarteko boluntarioei omenaldia egingo zaie. Elizako kanpandorretik behera etorriko da Herriko Plazara.

Osterantzean, honako egitaraua prestatu du jai batzordeak gaurko: goizeko 11:00etan, umeen jolasak; eguerdiko 12:30ean, udalekuetako umeen eskutik karaokea Herriko Plazan; arratsaldeko 14:00etan, umeen herri bazkaria; 15:00etan, umeen jolasak Herriko Plazan; 18:00etan, txupinazioa, kanpaiak eta kalejira txistulari, trikitilari eta buruhandiekin; 19:00etan, txosnak zabaltzea Zurrategi plazan; 19:30ean, Arrueren Salbea kantatuko du abesbatzak elizan; 20:15ean, udalbatzaren aurreskua; gaueko 22:00etan, euskodiskoteka; 23:15ean, suzko zezena Herriko Plazan; 23:30ean, Hontzaren jaitsiera; eta gauerdian, euskodiskotekaren bigarren txanda.

Autobusak gauez

Jaietarako gaueko autobus zerbitzua jarri dute biharko eta etzirako, hau da, egubakoitzerako eta zapaturako. Bihar hamaikak hogei gutxiagotan hasiko da Antzuolatik Zumarragarako zerbitzua eta ordubetero irtengo da autobusa. Antzuolatik Bergararakori, berriz, hamaikak eta laurdenetan ekingo zaio. Goizeko seiak eta laurdenak arte segiko du. Etzi, bestalde, ordubete lehenago hasiko dira, hamarrak hogei gutxiagotan eta hamarrak eta laurdenetan, eta bukatu ordu berean, seiak eta laurdenetan.

Barraketan ibiltzea 1,10 euro kostako da aurten. Hori bai, bost bidaiako bonuak salduko dira 5 eurotan. Domekan merkexeago egongo dira barrakak, euro 1en.