Edukira salto egin | Salto egin nabigazioara

Tresna pertsonalak
Hemen zaude: Hasiera › Hemeroteka › Udaberria hurbilago dela oharraraziz, Libertimendua Donapaleun eta Garazin eginen da

Dokumentuaren akzioak

Udaberria hurbilago dela oharraraziz, Libertimendua Donapaleun eta Garazin eginen da

Joan den larunbatean, Santibate ospatu zuten 50 bat zirtzilek Donapaleuko karrika eta ostatuetan. Aurten, pilota elkartean ere egin zuten halta bat. Kantuek, bertsuek, dantzek eta musikak giroa alaitu zuten. Baina gaueko ihauteria egina baldin bada, egun argikoaren beha dira orain Amikuztarrak, eta otailaren 23 antolatuko dute aurtengo Libertimendua. "Negu beltzetik ihes egin dezagun eta primadera omore onean errezebi" lemapean irekiko dute Libertimendua. Inauteri kari egiten den besta da Libertimendua. "Hau gure ihauteria da, gure gazteek erakusten digute gure plazan zer duten tripan, eta denek batean finitzen dugu dantzan. Horra sinpleki errana". Hitz horiekin laburbildu zuen 2010ean Mattin Irigoien antzerkigileak besta herrikoi honen xedea. Izan ere, Libertimenduak udaberria itxuratzen duten dantzari garbi, argi, mutu eta ederrak, Santibatez jaun eta jabe diren neguko Zirtzil ilun, zikin, geizki ikasi eta basatiak parez pare emaiten ditu. Bolanta, Baxe Nafarroako kabalkadaren pertsonai garrantzitsuena da, Libertimenduaren bitartez goresten dena. Denbora berean, udaberriak neguari gaina hartzen diola erakusten du ospakizun horrek. Donibane Garazin martxoaren 2an ospatuko dute Libertimendua.
Komunikabidea
Kazeta.info
Mota
Albistea
Data
2014/02/13
Lotura
Kazeta.info

Goizeko 9:30etan karrika-kurrida abiatuko da, Donapaleuko "lau hegaletan" dantza eta joko batzuk emanez. 11:00etan, abere merkatu plaza berrituan bilduko da jende guztia eta han ospatuko da aurtengo dantzarien eta zirtzilen arteko azken lehia. Ondoren, mutxikoak dantzatzeko aukera eskainiko dute. Ramuntxo Kristi eta Xumai Murua bertsolariak ere Donapaleun izanen dira.

13:00etan, bazkaria Airetik gelan eginen da, eta aurten, antolatzaileek indar berezi bat egin dute arratsalde guzian animazioek jarrai dezaten, kantu, bertsu eta dantzekin.

Bazkarirako, 05 59 65 62 34 edo 06 81 51 96 83 zenbakietara deituz eman daiteke izena.

Garazin ere

Ohituraz, Garaziko ihauteriak bi denboratan ospatzen dira: lehenik Santibate, zirtzilen besta, orroitarazteko negua beti hor zela. Ondotik Libertimendua, bolanten besta, primaderaren hastapena markatzeko. Duela zonbait urte Donibane Garaziko Garaztarrak dantza taldeak ohitura xahar horier segipen bat emaiteko xedearekin lan egiten du. Libetimendua martxoaren 2an ospatuko dute Baxe Nafarroko hiriburuan.

Lehengo garaietan, zirtzilak etxez etxe pasatzen ziren xerriki eske. Gaur egun besta horren ospatzen segitzen dute Donibane Garazin, dantzan, kantuz, Santibateko bertso zaharren plazaratzen eta xerriki eske ibiliz karrikaz karrika.

Patxi Iriart eta Battit Crouspeyre bertsolariek Libertimendua alaituko dute.

http://www.kazeta.info/uploads/2014/02/unnamed.jpg

Donapaleuko Libertimendua otsailaren 23an eginen da.

Dokumentuaren akzioak