Udaberria dantzan, Donibane Lohizuneko karriketan

Aurten hauek izan dira Donibanera gonbidaturik etorri diren dantza taldeak: Barakaldoko Laguntasuna, Larra�eko Errege Txopita, Iru�eko Muthiko Alaiak, Garaziko Garaztarrak, Izaba Dantza Taldea, Irungo Kemen eta Irungo Ibarla Dantza Taldea. Talde hauek Donibane Lohizuneko Begiraleak elkarteko dantzariekin batera karrikaz karrika eta bazterrez bazter ibili ziren igandea alaituz eta aberastuz.

Larunbatean bota zuen ekaitz handiak euri zaparradak ekarri zituen igandeko goizean, eta besta eder hau galtzeko arriskuan izan zen. Eguerdian mutxikoak ziren herriko plazan, eta ordurako Donibane gaineko zerua ateria zen. Jende ainitz lotu zen mutxikoak dantzatzeari, eta ondoren, dantzari guztiek eta nahi izan zuten gainerakoek Urdazuri auzoko kiroldegian bazkaldu zuten. Arratsaldeko 3,30etan karrikaz karrikako ibilaldiari hasiera eman zioten, eta erran beharra dago ordurako iduzkia zen nagusi Donibanen. Dantzariek saio ederrak burutu zituzten karriketan hasieran, eta 4,30etatik aintzina herriko plazan.

Izabakoen jantzi ezin ederragoek donibandarren eta bertara hurbildutako guztien miresmena bereganatu zuten, bizkaitarren dantza alaiek ikusleen bihotza irabazi, zuberotarren jauziek denok liluratu, gipuzkoarren solemnitateak bertan zirenen gogoa hunkitu, baxenafarren dantza eta soinu airoxek ikusle-entzuleak alegeratu, Begiraleak elkarteko neska-mutilen dantzak barne-barnean sentitu�

Dantza saioa iluntzeko 7ak aldera bururatu zen Ibarlako dantzariekin. Hauek plazatik soka-dantzan irtetean musikariek Mikel Laboak Euskal Herriko zazpi haizetara zabaldutako Txoriak txori izeneko kantua jo zuten eta plazan bilduta ziren guztiek kantuz lagundu zuten poztasun handiz. Hauxe izan zen, xihur aski, egunak eskaini zuen momenturik hunkigarriena. Ondoren, erromeria koloretsu eta alegera bati ekin zioten, eta bertan taldeetako dantzariak eta ikusleak nahasi ziren ohiko fandango eta arin-arinetan, mutxikoetan, zortzikoetan eta horrelakoetan izugarrizko giro ona erdietsiz. Erromeria bukatu zelarik euritik iduzkira igarotako igandea ere airoxki bukatua zen.

Lerro hauetatik Begiraleak elkartea eta bertara hurbildutako dantzari guzi-guziak zoriondu nahi ditugu Donibane Lohizuneri eman zioten besta ezin ederragoagatik. Urte luzez errepika dadin denon bozkariorako. 

VERONIQUE argazkia.