Txikiak eta helduak dantzan

Dantzari egunak antolatu dituzte astebururako Hondarribian, Bermeon eta Irurtzunen

Ondoren, 12:30ean, Santa Maria Madalena plazan talde bakoitzak hamabost minutuko saioa egingo du. Eguna erromeriarekin bukatuko dute, arratsaldeko seietan izango da Zumardian.

Bizkaiko dantzari eta dantzazaleek Bermeon daukate hitzordua asteburu honetan. Larunbat gauean, Artza frontoian, Gaita Dantzan dantza ikuskizuna egingo dute hainbat dantza taldek. Emanaldi horrekin girotuko dute herria biharamuneko egun berezirako. Izan ere, igandean ospatuko dute Bizkaiko Dantzarien Biltzarra. 11:30ean, Burujabetasun zelaian egingo dute dantza erakustaldi erraldoia. Saioak atal hauek izango ditu: dantzari dantza, Gipuzkoako dantzak, Eltziegoko dantzak, gorulariak, dantzari txikiak, kaxarranka eta larrain dantza. Eguna jai giroan igaroko dute. Horretarako, artisau azoka eta txosnak prestatu dituzte. Luhartz taldearen erromeria izango da 17:00etan, Lameran.

Txikienak Irurtzunen

Dantzari eguna ospatuko da Irurtzunen (Nafarroa), igandean, baina dantzari txikien eguna izango da. Nagusi izango dira txikienak igandeko egitarauan. Sakanako herrietan dantza ekitaldiak izango dira 11:00etan, eta 13:00etan Irurtzunen kalejira izango da plazaraino. Han ospatuko da ekitaldi nagusia, 13:30ean; bazkaria izango da ondoren, eta, 17:00etan, Oskorriren emanaldia.