Hemen zaude: Hasiera Hemeroteka Txikia onena denean

Dokumentuaren akzioak

Txikia onena denean

CCN Malandain - Ballet Biarritz eta Kader Belarbi

Egilea
Agus Perez
Komunikabidea
Berria
Mota
Kritika
Data
2010/09/15

Diseinu koreografikoaren oinarritzat Berliozen gai bereko sinfonia hartu du, eta partituraren inflexioei hertsiki atxikita eratu ditu dantzarien eboluzioak. Hautu horrek, noski, bere mugapenak ditu abstrakzioaren ikuspuntutik, eta oso dantza figuratiboa sorrarazi du, Berliozen obrak kontakizunaren deskribapen musikala dirudielako eta Malandainek deskribapen hori dantza bihurtu duelako. Narrazioari laguntzeko, dantzariek keinu dramatiko esplizituekin hornitu dituzte beren mugimenduak, eta giroak eta eszenak banatzerakoan rol nabaria jokatu dute hamasei kutxa metaliko handiek, nahiz eta batzutan kutxen erabilera oztopo bilakatu den koreografiaren benetako handitasunerako.

Igandeko emanaldi nagusia Kader Belarbiren konpainiarena izan zen, berak sortutako hiru koreografiarekin eta Mats Ek-en Tulips pieza laburrarekin. Salle des pas perdus izan zen gaueko lehena, eta han Louis Aragonen surrealismoa eta zuzenean jotako Prokofieven piano-musika hartzen dira pantomima poetiko bat eratzeko; Les épousés duoak bi anaiaren arteko maitasun mingarria aztertzen du Mahleren musika eraldatuarekin, eta Room izenekoan hiru bikoteren bilakaera aurkezten da Henryk Gorecki eta Arvo Parten musikarekin eta elementu eszeniko ugariren laguntzaz. Nahi handikoak iruditu zitzaizkidan hirurak, eta bikaina izan zen dantzarien maila, baina ene uste apalean mugimenduaren diseinuak ez dio ekarpen berezirik egiten dantza garaikideari.

Ordea, Mats Ekek bereziki Belarbirentzat sortutako Tulips duo trinko eta enigmatikoan Belarbiren dantzari-mailaren bikaintasunaz gozatu genuen, eta pieza harekin argi geratu zen itxuraz txikia dena handia izan daitekeela.

Lekuak: Miarritzeko Gare du Midi eta Kasinoa. Egunak: Irailaren 11 eta 12a.

Dokumentuaren akzioak