Txaikovskiren hiru suite dantzara eroan ditu Malandainek

Ballet Biarritzek 'Magnifique' lan berria estreinatuko du Donostiako Viktoria Eugenia antzokian

Asteburuan egingo du Malandain Ballet Biarritzek jendaurreko estreinaldia Donostiako Viktoria Eugenian, balet konpainiaren eta antzokiaren arteko lankidetzaren emaitza baita obra, Europako Batasunaren Feder-Interreg IV funtsekin babesturiko proiektua.

Malandainek berak azaldu duenez, «barne lotura esturik gabe» lotzen da Magnifique lana. Txaikovskiren suite orkestralek eta Petiparen koreografiek sorturiko emozio eta sentipenak taularatu nahi izan ditu koreografoak, sorburuko lanen «giro poetikoa» errespetatuz. «Errealaren eta irudikaturikoaren artean, eta lehenaren eta orainaren artean» kokatu du Malandainek berak eginiko dantza ikuskizuna, «norberak erabaki behar du zer den ikusten duena, eta zer bere imajinazioak irudikatzen duena».

Errealaren eta irudikatuaren arteko dantza hori islatzeko ispiluak erabili ditu Malandainek. Entsegu eta entrenamenduetan ohi duten bezala, 16 dantzariek ispiluekin egingo dute dantza Viktoria Eugenian, era horretan, 16 eman beharrean dantzan ari direnak 32 direla irudikatu nahi du sortzaileak, ilusio optikoak sortuz.

Tailerra, ikuskizuna osatzeko

Miarritzeko baletaren emanaldiaren harira, Gipuzkoako Dantza Profesionalen Elkarteak master class bat eta Malandainen obrari buruzko tailerrak antolatu ditu. Dominique Cordemans izango da larunbatean eta igandean emango dituzten tailerretako arduraduna. Ikastaro praktiko horiek bereziki 12 eta 14 urte bitarteko baleteko ikasleentzat dira.