Tradizioarekin harritzea lortu du aurten ere Kemen Dantza Taldeak

Aurreko uurtean ez bezala, atzo eguraldiak lagundu zien Kemenekoei, eta hilabetetan mimo handiz presturiko ikuskizuna behar bezala burutzeko aukera izan zuten. Hiru taula altxatu zituzten, eszenatoki handia dantzarientzat, eta bi taula txikiago alboetan, musikari taldearentzat bat, eta koruarentzat bestea.

Musika asko zaintzen dute Kemenekoek eta aurten Atzokoak abesbatzaren laguntza izan zuten. Hainbat doinu abestu zituzten, batzuk dantzarien lana laguntzeko, beste batzuk musikarekin soilik. Eguzkiaren izpiak ezkutatzen joan ziren heinean, abeslarien itzalak islatzen hasi ziren gazteluko murruan eta ikuspegi ederra eskaini zuten.

Euririk egiten ez duenean, gune bikaina da Arma Plaza kultur ekitaldietarako, eta atzoko emanaldia halakoa izan zen, bikaina. Saioa bukatzean, publikoak txalo askorekin agurtu zuen koruaren eta musikarien lana, baita, noski, dantzariena ere.

Kemen Dantza Taldeak atzo Arma Plazan emandako saioko une bat.