Tradizioa bizirik, Ordiziako plazan

Santa Ana jaien azken egunean, 1509tik egiten den Santanazaleen esku-dantza egin dute azkeneko urtebetean ezkondu diren bikote batzuek. Azken urteetako beherakadaren ostean, aurten 10 bikote atera dira plazara.

Ezkonberriak udaletxeko batzar aretoan elkartu dira lehenik, eta kofradiako liburuan idatzi dituzte euren izenak. Udaletxeko ekitaldiaren eta Santanazaleen mezaren ondoren, hamabietako kanpaiekin batera plazara atera dira ezkonberriak, txistulariek lagunduta.  Aurreskua, atzeskua eta sokadantzak egin dituzte jarraian, segida bakoitzean ezkonberrien bila udaletxeko arkupera joanda, plazara laguntzeko. Behin esku-dantzak bukatutakoan, fandango eta arin-arin bat dantzatu dituzte, herritarren txaloen artean. Kaleko buelta egin dute ondoren, Martinez taberna aurrean geratu eta ohiturazko dantzaldia egin dute. Ordizian ikusmin handia sortzen duen ekitaldia da, eta plaza ingurua jendez beteta egon da eguerdian.

[BIDEOA]

Ordiziako festak gaurko kuadrillen egunarekin amaituko dira. Santanazale berriek eman diote txupinari su, 13:00etan, kuadrillen irteera ofizialari hasiera emanez. 18:00etan, Euskal Herriko errekortarien ikuskizuna izango da, San Bartolomeko zezen-plazan. 21:00etan, Beti Argi musika bandak kalejira egingo du, eta 22:00etan Nonbait taldeak erromeria girotuko du, Garagartza plazan. 23:30ean Xaiborren disko-festa izango da, Bazterretxe plazan, eta 00:00etan En Esencia orkestraren dantzaldia, Plaza Nagusian.