Hemen zaude: Hasiera Hemeroteka Tempomobile izango da lehena Gasteszenako aurtengo egitarauan

Dokumentuaren akzioak

Tempomobile izango da lehena Gasteszenako aurtengo egitarauan

Egilea
Leire Aramendi
Komunikabidea
Euskaldunon Egunkaria
Tokia
Donostia
Mota
Albistea
Data
2003/01/16

Aurtengo denboraldia Tempomobile konpainiak irekiko du. Becky Siegel koreografoa eta Mikel Errazkin konpositorearen artean sortutako Airbon obra eskainiko dute. Bost dantzarik eta beste bost musikarik parte hartzen duten lan horretan, gizakiaren eta naturaren arteko harremana lantzen da.



Kataluniako dantza konpainia bat etorriko da martxoan: Mar Gomez konpainiak La ca sade lest aurkeztuko du. XX. mendeko familia burges batean girotua, zaharkituak geratu diren ohiturak defendatuko dituzte. Umorea, komedia eta satira nahasten dira obran.



Familia osoarentzako ikuskizuna



Familia osoarentzat eta, batez ere, bost urtetik gorako umeentzat prestatutako obra bat ekarriko du Donostiara Madrilgo Aracaladanza konpainiak. Visto y no visto dantza garaikideko ikuskizunean, artea mugimenduan ikus daiteke. Izaki bilakatu eta mota ugaritako formak har ditzaketen jantzi eta oihalak agertuko dira.



Azkenik, maiatzean, XVII. eta XVIII. mendeetako dantza barrokoetara eramango ditu ikusleak Frantziako L’Eventail dantza konpainiak.



Emanaldi guztiak 20:00etan izango dira, Aracaladanza izan ezik, 18:00etan izango baita.

Dokumentuaren akzioak