Soka-dantzarekin agurtu dituzte Sanjuanak

Hala ere atzo izan zen askoen-tzat ekitaldi nagusiena izaten dena. Goizean meza nagusia izan zen Kalezarko ermitan eta ohikoa izaten den legez jende dexente bildu zen ondoren plaza inguruan toka txapelketan parte hartu edo Gorritiren Showa ikusi asmoz.

Kalezartarrek soka dantza eskaini zuten arratsaldean. Azken urteetan bezala, Kalezarko gizon eta emakumeek ikuskizun polita eman zuten bertako plazan.

Omenduak

Arratsaldeko 19:00ak pasatxo hasi zen saioa. Lehenik eta behin Usurbil-zarreko omendu gabeko bi kalezartar adinekoak omendu nahi izan zituzten. Duela hiru urte auzoko adinekoenak omentzen hasi ziren eta atzo Pilar Ezkide eta Felix Olasagasti izan ziren omenduak. Lore sorta bana eta txapela eta zapia jaso zituzten dantzariengandik eta plazaren albo batean jarritako eserlekuetatik ikusi zuten saioa.

Ondoren, soka dantza eskaini zuten kalezartarrek. Ohikoa den bezala gizonezkoak izan ziren eskuak elkarri emanez soka baten gisan Kalezarko plazara irten zirenak txistuaren doinua jarraituz. Dantzarien soka zirkulu irekian antolatu zen plazan, eta sokaren bi muturretan zeuden dantzariek gidatu zuten dantza, aurresku eta atzesku izenekoek. Hasierako dantza eta aurrez aurrekoaren ondoren dantzari guztiek bana banan egin zuten dantza. Neskak atera zituzten plazara segidan, zapien bidez handiagoa eginaz.

Amaieran arin-arin eta fandangoak elkarrekin dantzatu zituzten, kalejirarekin ekitaldiari amaiera emateko. Aurtengoan, gainera, bertako gaztetxo batzuk ere animatu dira ohitura bihurtu den dantza honetan parte hartzera.