Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Seguran bergararrak txapeldun

Dokumentuaren akzioak

Seguran bergararrak txapeldun

Maite Lazkanok eta Asier Enak irabazi zuten, igandean, Euskal Herriko Dantza Solteko Txapelketa

Komunikabidea
Berria
Tokia
Donostia
Mota
Albistea
Data
2009/10/13

Sariketan parte hartu zuten dantzari guztien artean, bakarrak zuen aurretik txapelketa irabazia, Maite Lazkanok, hain zuzen ere. Bergarako dantzariak 2001ean eskuratu zuen lehenengo saria, orduko hartan Asier Enarekin bikotea osatuta. Asierren anaia da Aitzol, igandean Lazkanorekin bikotea osatu zuen dantzaria. Lazkanok utzi egin zion orain dela hiru urte txapelketan parte hartzeari, eta aurten itzuli da.

Eneko Gil eta Nerea Vesga iazko txapeldunek, berriz, ez dute parte hartu aurtengo txapelketan.

Igandeko txapelketan hamabi bikote dantzatu ziren. Arabatik, Mikel Arze eta Iratxe Ibisate (Gasteiz); Azaitz Unanue eta Aizkoa Medinabeitia (Gasteiz); eta Ana eta Marta Ruiz de Austri (Olabarri) aritu ziren. Bizkaiak bi bikote izan zituen ordezkari, biak Sestaokoak: Karlos De las Heras eta Oroitz Bilbao alde batetik, eta Arkaitz Pascuas eta Nagore De las Cuevas bestetik.

Gainerako bikoteak gipuzkoarrak izan ziren: Mikel Otegi eta Estela Atorrasagasti (Donostia-Orio), Jon Intsausti eta Iera Maiza (Ordizia-Olaberria), Aritz Arrillaga eta Amaia Bolinaga (Bergara) eta Xabier Etxaniz eta Leire Larrañaga (Azkoitia).

Aurreneko aldiz txapelketaren historian, bi emakumek osatutako bikote batek hartu zuen parte. Ana eta Marta Ruiz de Austrik txalo beroak jaso zituzten oholtzara atera zirenean.

Eskultura, urtebeterako

Nestor Basterretxearen eskultura urtebetez egongo da Bergaran. Izan ere, garaikurra beretzat eskuratzeko, hiru urtetan segidan edo bost alditan irabazi behar du txapelketa bikoteak.

Orain arte, sei bikotek baino ez dute Basterretxearen eskultura beraientzat eraman: Joxe Joan Ugaldek eta Lourdes Esnaolak; Antton Mendizabalek eta Amaia Illarretak; Edu Muruamendiarazek eta Amaia Agirrek; Kimetz Larrañagak eta Eneritz Epeldek; Jon Ander eta Edurne Azpitartek; eta Amaia eta Aitor Parrondok.

Dokumentuaren akzioak