Hemen zaude: Hasiera Hemeroteka 'Segura dantzari' dantza saioan ikuskizun paregabeak ikusteko aukera egon da asteburuan

Dokumentuaren akzioak

'Segura dantzari' dantza saioan ikuskizun paregabeak ikusteko aukera egon da asteburuan

Egilea
Andoni Etxeberria
Komunikabidea
Diario Vasco
Tokia
Segura
Mota
Albistea
Data
2006/06/20

Segurako folklorearen hainbat pasarte oholtza gainera eraman zituzten herriko haur eta gazteek, eta emanaldia oso gertukoa suertatu zen ikusleentzat. Beasaingo Aurtzaka taldeak Goierriko dantzak eszenaratu zituzten, eta Errenteriako Ereintza taldeak eta Kukai Dantza Konpainiak Euskal Herri osokoak.

Musikak ere atal garrantzitsua bete zuen ikuskizunean eta parte hartu zuten, besteak beste, herriko txistulariek, Musikeneko perkusio taldeak, Aitor Furundarena soinu joleak, Maialen Errotabere kantariak, Arkaitz Miner biolin joleak, Mikel Oliveri txistulariak edo Iñaki Apalategi bertsolariak.

Dantza soltea

Dantza solteko txapelketari dagokionez, Jon Ander eta Edurne Azpitartek irabazi zuten igandean jokatu zen lehiaketaren 30. edizioa. Azkoitiko anai arrebek iaz lortutako beraien lehen garaipena errepikatu zuten, bigarren Errenteriako Eneko Gil eta Nerea Vesga sailkatu zirelarik, eta Bergara eta Donostiako Aitzol Ena eta Miren Illarretarentzat izan zen hirugarren postua.

Beti bezala, bikote parte hartzaileek fandangoa txistuz eta arin-arina trikitixaz dantzatu zituzten, eta Azkoitiko anai-arrebek 371, 25 punturekin lortu zuten garaipena. Eneko Gil eta Nerea Vesgari 359, 75 puntu eman zizkieten epaileek eta 359, 25 hirugarren egin zuten Aitzol Ena eta Miren Illarretari.

Jantzien dotorezia nabarmentzeko sariketa ere ohizkoa da txapelketa honetan eta lehen saria Hernaniko Xabier Segura eta Lierni Martiarenak irabazi zuten eta bigarren saria Eneko Gil eta Nerea Vesgarentzat izan zen. Bikote gazteenarentzat gordetzen den Gilermo Areizaga saria Bergarako Jon Arrillaga eta Izarne Mendiak eskuratu zuten.

Atsedenaldian eta epaimahaiak sailkapena egiten zuen bitartean, Iñaki Telleria eta Joxe Joan Ugalderen Ziklus Dantz ikuskizuna eraman zen oholtza gainera.

Dokumentuaren akzioak