San Praixku jaietan murgilduko da gaur Aginaga

Ohikoa den bezala bi asteburutan hainbat ekintzaz gozatzeko aukera izango da

Jaien hasiera honetan, gaur 18.00etatik aurrera iazko jaietako argazki erakusketa ikusteko aukera izango da eta 18:30ean txupinazoa izango dute txanpainarekin. Jarraian preso ohien mural borratzea iragarrita dago eta patata tortilla lehiaketa izango da 19:30ean hasita. Ondoren, lehiaketaren aitzakian, tortila afaria egingo dute. Aurtengo San Praixku jaietako lehen egun hau amaitzeko, XV. Gizonezkoen pala txapelketako finala eta Aginagako XV. Eskuzko Pilota txapelketako finala jokatuko dira 21:30ean hasita.

Bihar, berriz, oilasko biltzaileen eguna izango dute. Goizeko 5:30ean oilasko biltzaileen gosaria iragarri dute eta 6:00etan irtengo dira baserriz baserri oilaskoak biltzera. 11.30etan Aginagako haurrak eta animatzen direnak oilasko biltzaileekin batuko dira Mapilen eta 14:30ean oilasko biltzaileek bazkaria izango dute Sekañan.

Arratsaldeko ekimenei dagokionez, 17:00etan Haurren Molto Moto lasterketa izango da eta 18:00etan haurrentzako karaokea. 19:00etan, berriz, Kantujira izango da eta bitartean buruhandiak ere Aginaga aldean ibiliko dira. 21:00etan herri afaria iragarrita dago. Txartelak aurrez erosi behar dira Aitzaga tabernan edota Aginagako Arrate egoitzan. Helduek 25 euro ordaindu behar dituzte eta haurrek 12. Goizaldeko 1:00etatik aurrera Oharkabe taldearekin erromeria izango da frontoian eta 4:00etan Seymar Dj eliza zaharrean.

Iganderako ere ekintza desberdinak antolatu ditu Aginagako Jai Batzordeak. Goizeko 7:00etan baratxuri zopa banatuko da Atarialde elkartean eta 9:00etatik aurrera tiro platoa izango da. Eguerdiko 12:30ean, berriz, Aginagako haur dantzari taldearen emanaldia iragarrita dago. 17:00etan haurren pilota txapelketa herrikoia izango da frontoi txikian. Arratsaldeko 18:30ean, berriz, herriko Orbeldi dantza taldeak apirileko V. Dantza Egunean aurkeztu zuen 'Indiana Jones eta Kaliz sakratua' ikuskizuna eskainiko du Aginagako pilotalekuan. 70 dantzari inguruz gain, antzerkilariak eta musikariak ere bertan izango dira. Egunari amaiera emateko piper frijitu eta sagardo banaketa izango dira Aginagako plazan ekitaldi honen ostean.

Asteazkenean, urriaren 4an, San Praixku eguna ospatuko dute. Goizeko 11:00etan meza nagusia izango da eta ondoren herriko jubilatuei hamaiketakoa eskainiko zaie Aginaga Sagardotegian bertsolari eta guzti. Arratsaldeko 18:00etan herritarren arteko herri kirolak izango dira eta 18:30ean sardina eta sagardo dastaketa musikaz alaitua. Bitartean, XXXV. Toka txapelketa izango da.

Ostiralean, berriz, umeen eguna izango dute. Haurren jolasak izango dira goizeko 10:00etan hasita eta bazkaria izango dute 13:00etan. Arratsaldean tailerrak eta puzgarriak izango dituzte frontoian Txatxilipurdikoekin, segidan txokolata jateko aukera izango delarik. 18:30etik 19:30era, gainera, disko festa izango da eta ondoren apar festa. 21:00etan gazte afaria iragarrita dago Aginaga sagardotegian eta 00.00etan hasita Rukula eta Eskean Kristö taldeekin kontzertua eliza zaharrean. Amaitzerakoan karaokea izango da.

Urriaren 7rako ere, larunbaterako, ekimen ugari antolatu ditu Aginagako jai batzordeak. XXXVI. mus txapelketa herrikoia egingo dute 16:00etan, izen ematea 15:30etik 16:00etara egiteko aukera izango delarik. 18:00etan Gorriti bertan izango da eta 19:30etan poteoa egingo dute Elektro Txufla elektrotxarangarekin. 00:30ean Odolaren Mintzoa eta Laket taldeak entzuteko aukera izango da frontoian, eta goizeko 4:00etan Jotatxo Dj. eta Balber Dj eliza zaharrean.