Hemen zaude: Hasiera Hemeroteka San Esteban dantzan

Dokumentuaren akzioak

San Esteban dantzan

Egilea
Aizpea Esnaola
Komunikabidea
Berria
Mota
Albistea
Data
2010/08/01

Sanestebanak bihar hasiko dituzte Beran (Nafarroa). Txupinazoa 12:00etan botako dute udaletxetik, bertan bildutako guztien aurrean, txaranga eta gaiteroak giroa berotzen duten bitartean; umeentzat gozokiak ere banatuko dituzte, eta horren ondoren, erraldoiek eta buruhandiek hartuko dituzte Berako kaleak, ia astebetez herria jaietan murgilduz.

Asteartea izango da jaietako egun nagusia, San Esteban eguna izango da, eta berezia izaten da beratarrentzat; beren santua bertako dantza tradizionalak dantzatuz omentzen dute. Dantza izaten da protagonista, beraz, egun horretan; udalbatza, txistulariak eta makil dantzariak Berako bandera gainean hartuta, udaletxetik San Esteban elizara abiatzen dira Esteban Donearen ohoretan, eta Berako abesbatzak lagunduta ematen da meza nagusia. Meza nagusiaren ondoan, dantza emanaldia izaten da Gure Txokoa dantza Taldeko kideekin, txistularien laguntzaz aritzen dira horiek. Berako makil dantzak eta pordondantza egiten dituzte.

Euskal dantzak

Herriko ohitura tradizionalak izaten dira gehienbat egun osoan. Arratsaldean, aurreskua dantzatzen dute, Herriko Etxeko plazan, eta iluntzean, Altzateko karrikan herri dantzak izaten dira -fandangoa, arin-arina, Larrain dantza eta abar-; dantza taldeaz gain, bertara joaten diren guztiek izaten dute izerditzeko aukera. Giro ederra izaten da San Esteban egunean. Gorputza astinduz ekinten diote egunari, eta amaitu ere horrelaxe egiten dute; dantzan, alegia.

Ikusgarria izaten da haur, gazte eta zaharrek dantza tradizionalek bilduta festaz nola gozatzen duten.

Jaiek irauten duten bitartean, ez dira faltako bertsolariak, txarangak, haurren jokoak eta kontzertuak. Triki Ta Ke, Laiotz, Bad Sound System eta Xutik taldeak izango dira, besteak beste.

Haurrentzako, berriz, puzgarriak, erraldoiak eta buruhandiak izango dira jaietan, baita kukaña esaten diotena ere.

Giroz beteriko bost egun dituzte aurretik Beran, bertara joaten denak festaz gozatzeko aukera paregabea izango du.

 

Egitaraua

 

 

BIHAR

 

 

12:00.

Txupinazoa udaletxetik; ondoren, erraldoi eta buruhandiak.

 

19:00.

Txosna irekiera Altzateko plazan.

 

00:00.

Dantzaldia Triki Ta Ke taldearekin, Altzaten.

 

ETZI

 

 

10:30.

Meza Nagusia San Esteban elizan. Meza ondoren, Berako dantza tradizionalak.

 

00:00.

Laiotz taldearekin dantzaldia Altzateko plazan.

 

ASTEAZKENA

 

 

23:00.

Kontzertuak txosnetan: Amets Ilunak, Sutan eta Bad Sound System.

 

OSTEGUNA

 

 

14:00.

Kantu bazkaria Altzateko pilotalekuan.

 

00:00. Saltoka Taldea Altzateko plazan, Denok dantzara!

 

Dokumentuaren akzioak