Edward Clugek Radiohead taldearen musikarekin sortutako obra emango dute Maitaldian

Edward Clugen proiektu berria da Radio & Juliette, maitasun istorio ospetsuenetako bat, Shakespeareren Romeo eta Julietarena alegia, Radiohead rock talde ingelesaren musikarekin nahasten duen koreografia berritzailea. Radioheaden OK Computer diskoko konposizioak erabili ditu Clugek obra berria eraikitzeko. Baz Luhrmannenen Romeo and Juliet filmerako bi pieza konposatu zituen Radioheadek, eta orain berriro uztartu da maitasuna, gorrotoa, indarkeria eta gizakiak berezkoak dituen sentimenduak goreneko adierazpenean erakusten duen obrarekin.

SEKULA ULERTU GABEKO MAITASUNA. Edward Clugek azaldu duenez, koreografia Julietak Romeo hilik aurkitzen duen unean hasten da. «Sekula ulertu ez den maitasunaren atzera begirakoa da ikuskizuna».

Radioheaden musika inspirazio iturria izan da koreografoarentzat, Clugek berak onartu duenez. Balletak etengabeko erreferentziak egiten die egungo arazoei. Antzinako istorioa izanagatik, egileak gaurkotasunezko obra sortu nahi izan du, eta Radioheaden kantuetan politika, arazo sozialak eta bestelakoak islatuta daudela uste du. Unibertso musikal hori oholtzan islatzea du helburu.

Radio & Juliette gauzatzeko Esloveniako Maribor Balletaren parte-hartzea izan du Edward Clugek. Errumaniako koreografo eta dantzari preziatuak proiektua aurrera ateratzeko proposamena egin zion dantza taldeari eta elkarlan horren fruitua gaur ikusi ahal izanen da Miarritzen. Sarrera merkeena 14 euroren truke erosi ahal da, eta garestiena 25 euroren truke.

Miarritzeko Maitaldia dantza festibalaren 16. ekitaldia hilaren 8an hasi zen eta 17an amaituko da. Egunotan kale ikuskizunak areto barrukoekin nahastu dira egitarauan. Gaur, ikusmina piztu duen ikuskizun honen txanda izanen da.