Oteizaren omenezko dantza

Oteizaren omenezko 'Apostoluen sokadantza' lana estreinatuko du Argiak gaur Donostian

Juan Antonio Urbeltz da koreografiaren sortzailea, eta, hark azaldu duenez, duela 40 urte Donostiako Viktoria Eugenia antzokian Argiak estreinaturiko Eaurtako neska dantza lana ikusi ondoren sortu zuen Axuri beltza. Abestutako dantza zen hura, eta kantako lehen hitzak «axuri beltza» ziren. Ordutik dantza taldeen bilduman sartu dute.

Argia taldea 1960ko hamarkadan sortu zuten, eta hasieratik lan egin du Euskal Herriko folkloreko piezak berreskuratu eta gaurkotzeko. Jorge Oteizaren Arte Garaikideko Euskal Eskolaren partaide izan zen taldea.

Eskultorearen omenez, Apostoluen sokadantza sortu du orain Urbeltzek, estreinu gau hura gogoan. Koreografiaz gain, jantzien diseinua ere Urbeltzek berak egin du. Marian Arregik moldatu du musika. Iñaki Arregi, Fernando Aristizabal eta Jexux Larrea dantza maisuak aritu dira koreografia lantzen, 90 inguru dantzarirekin, Argia taldekoez gain, Iruñeko Duguna, Elgoibarko Haritz, eta Eibarko Kezka taldekoak (Gipuzkoa). Koldo Ameztoi kontalariak eta Renoko (AEB) Lisa Corcostegui dantzariak lagundu dute ikuskizunean. Donostiako Musika Hamabostaldiko zuzendaritzak eskatu zion Urbeltzi, 2008an, Jorge Oteiza eskultorearen jaiotzeko mendeurrena ospatzeko koreografia. Horrela sortu zuten gaur egingo duten lana.

'AXURI BELTZA'

Argia dantza taldea. Gaur, 20:00etan, Viktoria Eugenia antzokia, Donostia.