Hemen zaude: Hasiera Hemeroteka Oinkari dantza taldea Katalunian

Dokumentuaren akzioak

Oinkari dantza taldea Katalunian

Egilea
Imanol Arratibel
Komunikabidea
Diario Vasco
Tokia
Villabona
Mota
Albistea
Data
2006/09/09

Aurrez eginiko lana haundia izan zen, ez izan zalantzarik, baina guztia erakusteko ordua iristean barruko arra ere dantzan jarri zen. Urduritasunak urduritasun, dantzariek zuten guztia eman zuten taula gainean. Harrera ezin hobea izan zuten Oinkariko dantzarien pausuek. 'Noraino altxatzen dute hanka dantzari hauek!', 'Ikusi al duzu kaxaren gainean dantzatzen duen mutikoa?', 'Edalontziaren gainera salto egiteak ez du erraza izan behar, alajaina!' Harriduraz betetako esamesak entzuten ziren eszenatoki inguruan, beti ere zorionak ematera inguratzen zirenen zirrararekin tartekatuz. Gaua borobila izan zen, dantzarien eta ikusleen arteko konexioak bikain funtzionatu baitzuen.

Les Borgues Blanques alde batera utzi eta dantza taldea L'Arboçen pentsatzen jarri zen. Entsegu sorta baten ostean, iritsi zen berriz ere euskal dantzak etxetik ateratzeko eguna. Abuztuak 25, iluntzeko 22:30ak. L'Arboçeko udal enparantza goraino beterik. 'Zenbat lagun ote daude gure dantzen zain?' dantzari batak besteari galdera. '200? 400? 600?' galderetik erantzunetik baino gehiago zuten hitzak ordainetan besteak batari. Geroago jakin zutenez oker zebiltzan beren kalkuluetan. 1.000 pertsonaren aurrean dantza egiteko ohorea izan zuen Oinkari dantza taldeak gau hartan. Sortu zen giro apartak eragina izan zuen dantzariengan, animo eta txaloek aurpegian marrazten zieten irribarrea lekuko. Benetan saio animatua eta hunkigarria. Erraz ahazten ez den horietakoa.

Bihar, Bermeoan

Billabonako Oinkari dantza taldeak dantza emanaldia eskeiniko du Bermeoko Lamera parkean bihar eguerdiko 13:00etan. Bertan bere azken emanaldia Oroituz izango da ikusgai eta dantza taldetik jakinerazi digutenez bitxikeri pare bat gehitu berri dizkiote emanaldiari. Ikusi nahi izan ezkero, Bermeo-n duzue aukera.

Kurtso amaiera Oinkarikoentzat «berandutxo datorren arren, beraien berri laster izatea espero dugu. Gainera, esan digutenez hartzera doazen opor labur hauetan emanaldi berria prestatzeko indarrak hartuko omen dituzte. On egin diezaietela ba deskantsuko egun hauek, mereziak dituzte eta. Baina ez luzatu gehiegi, zuen zai egongo gara eta!», dio Eneko Arteaga, Oinkari dantza taldeko arduraduna.

Oinkari dantza ikastaroa

2006-07 ikasturtea hasi den honetan, Oinkari dantza taldeak haurrei zuzenduriko ikastaroei ekingo die, datorren astelehenean (Irailak 11) zehatzago esanda. Taldeak eta ordutegiak dantza taldearen web orrian ( www.oinkari.net) dituzue ikusgai. Oraindik ere inork izenik eman nahi izango balu, ikastaroen ordutegian Txermingo Ikastolako ganbarara inguratzea besterik ez luke..