Edukira salto egin | Salto egin nabigazioara

Tresna pertsonalak
Hemen zaude: Hasiera Hemeroteka Oberenako dantzari egun zinez hunkigarria

Dokumentuaren akzioak

Oberenako dantzari egun zinez hunkigarria

Barañaingo Auditorioa lepo bete zuten 639 lagunek. Oholtza gainean Oberena dantza taldean aritutako eta ari diren 300 dantzari eta musikaritik goiti bildu ziren

Hunkigarria. Horixe da aurtengo Oberenako dantzarien eguna hobekien deskribatzen duen hitza. Izan ere, ikusgarri oso berezi bat taularatu zuen Oberena dantza taldeak abenduaren 3an. Barañaingo Auditorioa lepo bete zuten 639 lagunek, belaunaldi guzietako dantzari eta musikariak ikusteko. 300 lagun baino gehiago igo ziren oholtzara ia hiru ordu iraun zuen emanaldian. Oberena. 75 urte dantza eraikiz ikuskizuna zuzenean ikusteko dokumental bat izan zen. Taldearen historia kontatu zuen emanaldiak, eta horretarako hainbat pertsonen testigantzak proiektatu ziren eszena bakoitzaren aurretik. Bideoaren ondotik, beti dantza, baina hori bai, zuzenean.
Komunikabidea
Oberena dantza taldea
Mota
Albistea
Data
2016/12/08
Lotura
Oberena dantza taldea

Ikuskizunak Oberena dantza taldearen lehenbiziko emanaldia ekarri zuen gogora, Elon 1941eko abuztuaren 15ean egindakoa. Ondoren historiako beste pasarte batzuk izan zuten tokia: Alaitasunaren eguna, Obanosko misterioa, Eguberrietako jaialdiak, txistu eskola, Ama-lur ikuskizuna, bidaiak eta Lizarren doinua ikusgarria, kasurako. Gainera, lehenbiziko urte haietan aritu ziren dantzari eta txistulariei omenaldia egin zitzaien.

Ikuskizunaren ondotik, dena bildu, eta agudo Uslaer jatetxera joan ziren dantzari eta musikariak. Han, primeran bazkaldu ondoren, musika eta dantzarekin jarraitu zuten gaueko 23:00ak arte. Aspaldiko kideak ikusteko aukera izan zuten, edo bazkalondoan dantza gehiago egiteko. Primerako giroa izan zen.

Bukatu da, akabo

Modu honetan bukatu dira 75. urteurreneko ekitaldiak. 2015eko martxoan hasi ziren, Oberenaren urteurrenarekin batera. Orduan flashmoba grabatu zuten Mercaderes karrikan. Segidan hamaika jarduera antolatu zituen taldeak: emanaldiak, erakusketa, kontzertuak… Webgune berria ere urteurrenarekin batera etorri zen, baita han eta hemen jasotako omenaldiak ere: Azpilagañako jai batzordearena, Nafarroako Gobernuarena eta iruindarrena. Ezin ahantzi ere urteurreneko ekitaldien artean izan diren bi ikusgarri berezi: Heldu sokari eta Iturri zaharretik, indar berriz. Orain, ehungarrenera. Aunitz urtez Oberena dantza taldea!

http://oberenadantzataldea.eus/wp-content/uploads/2016/12/ND5_7602-1-e1481221790678-750x290.jpg

nd5_7602-1

Dokumentuaren akzioak